У комплексах ці асобна? Спыталі ў лекара, як правільна піць вітаміны

Увесну многія людзі ўспамінаюць пра здароўе і пачынаюць напіхваць у сябе вітаміны. Хтосьці выбірае комплексы на месяц, іншыя — больш схільныя купляць вітаміны асобна. А як правільна?

У інтэрв'ю Еўрарадыё лекар Мая Церакулава расказвае пра тое, чаму комплексы вітамінаў — гэта бессэнсоўная трата грошай, а прымаць вітаміны паасобку неабходна толькі узгадніўшы з доктарам.

— Дык вось, вітаміны ці вітамінна-мінеральныя комплексы?

— Здароваму чалавеку не трэба прымаць вітаміны ў выглядзе біялагічна актыўных дабавак да ежы ў прынцыпе — трэба проста правільна харчавацца. Дастатковая колькасць вітамінаў змяшчаецца ў стандартнай дыеце. Калі ў вашым тыднёвым рацыёне ёсць морква, рыба, печань, шпінат, гранат, ківі, мяса — гэтага дастаткова, каб забяспечыць нас усім, што патрэбна.

Напрыклад, калі мы будзем гаварыць пра вітамін K, у 100 грамах брокалі змяшчаецца сутачная доза, у 100 грамах салодкага перцу — 20 працэнтаў сутачнай дозы.

Правільна прыгатаванае рагу з агародніны вырашыць праблему вітамінаў на тыдзень. Калі мы прыгатуем кавалак ялавічнай печані, то мы надоўга закрыем пытанне з вітамінамі Е і К.

Увогуле, усё што нам трэба — здаровае харчаванне. Ніякіх экзатычных фруктаў шукаць не трэба.

— Як гэта працуе?  

— Наш арганізм эвалюцыянаваў і навучыўся збіраць неабходныя вітаміны і мінеральныя рэчывы з таго, што мы ямо паўсядзённа. Мы сфармаваліся на планеце Зямля з таго, што яна нам прапануе. І самая звычайная дыета вашага рэгіёну — гэта лепшае, што можа быць для вас.

Калі вы здаровы дарослы чалавек без хранічных захворванняў, напрыклад, кішэчніка, страўніка, нейкіх генетычных паталогій, якія перашкаджаюць засваенню неабходных элементаў з прадуктаў — нічога прымаць не трэба.

Калі ў вас ёсць нейкая праблема са здароўем, трэба ісці да лекара і вырашаць гэтую праблему. Альбо атрымліваць індывідуальныя рэкамендацыі па дадатковых вітамінах і мінералах, з якімі ў вас могуць быць праблемы на фоне пэўных захворванняў. Усім чыста людзям есці вітаміны проста не патрэбна.

— Навошта тады прадаюцца комплексы вітамінаў, калі няма сэнсу прымаць усе вітаміны без разбору?

— Лекары заўсёды прызначаюць канкрэтныя вітаміны. Напрыклад, пры шэрагу неўралагічных паталогій даюць карысць вітаміны групы B. Калі ў нас ёсць праблемы з сасудамі і чалавеку трэба падвысіць утрыманне магнію, яму таксама будуць прызначаць вітаміны B, таму што яны паляпшаюць засваенне магнію.

Гэта заўсёды мэтавае, зразумелае, рацыянальнае прызначэнне.

І калі мяне як лекара запытаюць, што лепш — комплексы ці асобныя вітаміны, я скажу, што вядома, асобныя вітаміны. Я разумею, што выпісваю, якая дазіроўка, для чаго канкрэтна, што менавіта гэта дасць чалавеку.

А проста комплексы супакойваюць трывожных людзей, якія, прымаючы іх, думаюць, што клапоцяцца пра сваё здароўе. На самай справе, усё, на што здольныя комплексы вітамінаў і мінералаў — яны робяць мачу і кал чалавека больш дарагімі. 

Вітамінна-мінеральныя комплексы — гэта звычайны бізнес.

— Пасля зімы арганізм чалавека можа аслабляцца. Ці варта кожнаму з нас у сакавіку ісці па дактарах і здаваць аналізы, каб зразумець, што з намі не тое і якіх вітамінаў і мінералаў не хапае?

— Не, калі чалавек сябе нармальна адчувае, не трэба хадзіць па дактарах. У паліклініках шмат хворых, якія могуць вас чым-небудзь заразіць. Да доктара трэба звяртацца тады, калі ў нас ёсць канкрэтныя скаргі.

Я не буду рэкамендаваць ніякіх аналізаў, ніякіх спецыфічных вітамінных комплексаў, ніякіх там пратэінавых напояў, таму што гэта не мае сэнсу.

Калі хочацца быць здаровым, раю ўсім штодня гуляць па тры-чатыры гадзіны, весці актыўны лад жыцця і харчавацца здаровай ежай па прынцыпе: чвэрць талеркі злакаў, чвэрць — бялкоў і палова гародніны і садавіны.  

Нічога новага пакуль не вынайшлі.