Пра нас

Еўрарадыё — незалежнае кросплатформавае медыя для Беларусі і пра Беларусь. Мы працуем з 2006 года і кожны дзень, 24 гадзіны на суткі, сем дзён на тыдзень, прытрымліваемся наступных прынцыпаў і каштоўнасцяў:

1.   Незалежнасць. Рэдакцыйную палітыку Еўрарадыё вызначае толькі сама рэдакцыя, на яе не маюць уплыву ні палітычныя сілы, ні ўрады розных краін, ні прадстаўнікі бізнесу.

2.   Сумленнасць. Асноўная мэта Еўрарадыё — даносіць беларусам праўдзівую інфармацыю пра тое, што адбываецца ў Беларусі і свеце. Мы прытрымліваемся журналісцкіх стандартаў, правяраем факты, абвяргаем фэйкі дзяржпрапаганды і імкнёмся не толькі паведамляць аўдыторыі аб'ектыўную інфармацыю, але і рабіць свой унёсак у развіццё крытычнага мыслення і медыяпісьменнасці нашых чытачоў, слухачоў і гледачоў.

3.   Нацыянальная ідэнтычнасць. Важная частка працы Еўрарадыё — захоўваць і ўмацоўваць самасвядомасць беларусаў, пашыраць выкарыстанне нацыянальнай мовы, паляпшаць веды беларускай культуры і гісторыі.

4.   Дэмакратыя і правы чалавека. Мы бачым Беларусь будучыні дэмакратычнай краінай з устойлівым інстытутамі, адкрытым дыялогам у грамадстве і канкурэнцыяй ідэй, дзе магчымасці для самаразвіцця і самарэалізацыі ёсць у кожнага(ай).

5.   Талерантнасць і адкрытасць. Еўрарадыё выступае супраць выкарыстання мовы варожасці ў дачыненні да любой з уразлівых груп (мігранты, ЛГБТК+, людзі з інваліднасцю і г.д.), дыскрымінацыі і сацыяльнай стыгматызацыі і як медыя, і як працадаўца. Мы прыхільныя ідэалу гендарнай роўнасці, імкнёмся да яго ў рэдакцыі і ў тым, як асвятляем тыя ці іншыя тэмы.

Хто фінансуе Еўрарадыё?

Еўрарадыё не з'яўляецца часткай дзяржаўнага медыясектара ніводнай з краін свету. Мы — мульцідонарская арганізацыя, якая атрымлівае падтрымку ад розных партнёраў з розных краін і кантынентаў. Незалежна ад памеру падтрымкі ніхто з донараў не можа ўмешвацца ў нашу рэдакцыйную палітыку.

З меркаванняў бяспекі мы не можам прывесці поўны спіс партнёраў, але лагатыпы некаторых з іх размешчаныя ў ніжняй частцы нашага сайта.

Таксама Еўрарадыё абапіраецца на падтрымку аўдыторыі. Вы можаце стаць адным з нашых сяброў-донараў на Patreon, праз PayPal, Streamlabs або аформіць данат ці падпіску на YouTube.