20 магнітаў дасталі гомельскія хірургі з кішэчніка двухгадовага хлопчыка

Паспяховую аперацыю на кішэчніку двухгадовага дзіцяці правялі дактары Гомельскай абласной дзіцячай клінікі.

У мінулыя выходныя маці з дзіцем схадзілі ў госці, а потым хлопчык стаў скардзіцца на боль у жываце. Высветлілася, што ў яго кішэчніку было 20 магнітаў, паведамляе тэлерадыёкампанія "Гомель".

Іншародныя целы дасталі падчас аперацыі. Пры гэтым дзіцяці давялося выдаліць тры фрагменты кішкі, на кожным з якіх утварыліся па дзве скразныя адтуліны. Пасля гэтага медыкі аднавілі цэласнасць кішкі.

Цяпер малечу чакае доўгая рэабілітацыя: трэба, каб кішэчнік зросся і запрацаваў.

Дактары кажуць, што найбольш небяспечныя сітуацыі, калі маленькія дзеці глытаюць батарэйкі і магніты. Часцей за ўсё яны могуць праглынуць штосьці не тое ва ўзросце трох-пяці гадоў. Менавіта тады дзеці актыўна пазнаюць свет, у тым ліку на смак.

Летась у Гомельскай абласной дзіцячай клінічнай бальніцы аказалі дапамогу 119 пацыентам, якія праглынулі іншародныя целы.