Польшчу пазбавілі права правесці чэмпіянат Еўропы — за візы беларусам і расіянам

Польшча засталася без двух буйных міжнародных турніраў па цяжкай атлетыцы. Сёлета ў краіне мусілі адбыцца чэмпіянаты Еўропы сярод юніёраў і цяжкаатлетаў да 23 гадоў. Аднак Еўрапейская федэрацыя цяжкай атлетыкі (EWF) адклікала дазвол на правядзенне гэтых спаборніцтваў у Польшчы.

"Гэтае рашэнне было прынята пасля таго, як краіна не забяспечыла неабходныя гарантыі візавага доступу для спартоўцаў з Расіі і Беларусі", — гаворыцца ў афіцыйным тлумачэнні, якое цытуе Польскае радыё.

У федэрацыі заявілі аб прыхільнасці прынцыпу, што "спорт павінен заставацца вышэй за палітыку".

"Федэрацыя выступае за інклюзіўнасць, роўныя магчымасці і адзінства праз спорт і не прымае дыскрымінацыі паводле палітычных ці геапалітычных меркаванняў, асабліва ў часы ўзмацнення напружанасці ва ўсім свеце", — заявілі ў EWF.

Спаборніцтвы перанеслі ў Албанію.

Дарэчы, аналагічная сітуацыя ўжо была ў 2024 годзе. Тады Польшча таксама адмовілася выдаць візы спартоўцам з Беларусі і Расіі. У выніку краіну пазбавілі магчымасці правесці чэмпіянат Еўропы па цяжкай атлетыцы сярод юніёраў да 15 і 17 гадоў. Тады чэмпіянат перанеслі ў Іспанію.