Натоўпы ў міліцыю і IT, у педагогі не ідуць: як абітурыенты падаюць дакументы

12 ліпеня ў Беларусі пачалася ўступная кампанія. Еўрарадыё паглядзела, як ідзе прыём дакументаў, на якія спецыяльнасці ўжо праз тры дні склаўся шалёны конкурс, а на якія наогул ніхто не хоча паступаць.

Як справы ў БДУ

У галоўнай ВНУ краіны конкурс ужо склаўся на юрыдычным факультэце і на факультэце міжнародных адносін — па ўсіх спецыяльнасцях колькасць пададзеных заяў перавысіла колькасць бюджэтных месцаў.

Вельмі вялікі конкурс на тэхнічныя спецыяльнасці. На "Прыкладную інфарматыку" механіка-матэматычнага факультэта ўжо пададзена больш за 105 заявак, пры тым што бюджэтных месцаў усяго 65.

Практычна склаўся конкурс і на ваенным факультэце — на некаторыя спецыяльнасці ўжо прэтэндуе больш за тры чалавекі на месца.

Самыя незапатрабаваныя спецыяльнасці ў БДУ-гэта "Экалогія" на біяфаку і "Рамана-германская філалогія" на філфаку — за тры дні кампаніі сюды прынеслі ўсяго толькі па адной заяве на паступленне.

Ці складана паступіць у БНТУ?

Калі хочаце стаць тэхнаром без нерваў, то вам дарога ў БНТУ — на большасці спецыяльнасцяў конкурс яшчэ не склаўся.

А на некаторыя спецыяльнасці дакументы наогул ніхто не падаў, напрыклад, на "водныя транспартныя суда" на факультэце энергетычнага будаўніцтва.

Больш за ўсё заяў у БНТУ прынеслі на спецыяльнасць "Будаўніцтва будынкаў і збудаванняў" — 113 пры наборы ў 78 чалавек і на "Праграмную інжынерыю" — 66 заяў пры наборы ў 39 чалавек.

Ці цяжка стаць айцішнікам у БДУІРы

А на бюджэт галоўнай кузні беларускіх айцішнікаў так проста не праб'ешся. На многія папулярныя спецыяльнасці конкурс ужо склаўся.

У прыватнасці, на "Праграмную інжынерыю" факультэта камп'ютарных сістэм пададзена ўжо 136 заяў пры плане ўсяго ў 36 чалавек.

А, напрыклад, на спецыяльнасць "Інфармацыйныя сістэмы і тэхналогіі" на факультэце інфармацыйных тэхналогій ужо зараз складваецца конкурс больш за чатыры чалавекі на месца.

Вядома, ёсць і зусім не папулярныя спецыяльнасці. Напрыклад, на "Звышвысокачастотныя сістэмы" пададзена ўсяго пяць заяў, а набор складае 25 чалавек.

Эканамісты з БДЭУ яшчэ запатрабаваныя

На многія спецыяльнасці ў "наргасе" конкурс таксама ўжо ёсць.

Вялікай папулярнасцю карыстаюцца спецыяльнасці "Маркетынг" і "Правазнаўства" — тут ужо больш за два чалавекі на месца.

Адна з самых незапатрабаваных спецыяльнасцяў — "Статыстыка", тут падалі заявы восем чалавек, пры конкурсе ў 25.

Перакладчык у МДЛУ — гэта топ

Калі хочаце звязаць сваё жыццё з англійскай мовай, то трэба вельмі пастарацца, каб паступіць.

Напрыклад, на перакладчыцкую справу ўжо прэтэндуе больш за два чалавекі на месца, тое ж самае і з міжкультурнымі камунікацыямі.

Прасцей прабіцца на факультэт нямецкай або факультэт раманскіх моў — там конкурс яшчэ не склаўся.

Што з настаўнікамі ў БДПУ?

У сістэму адукацыі беларусы зусім не імкнуцца. Асабліва гэта тычыцца дашкольнай адукацыі: пры плане ў 145 чалавек, дакументы прынеслі ўсяго 65.

На беларускай філалогіі конкурсу яшчэ няма: падалі заяву толькі 17 абітурыентаў, а план складае 20.

З рускай філалогіяй справы лепей: на бюджэт ужо прэтэндуюць амаль два чалавекі на месца.

Конкурс на спецыяльнасць настаўніка матэматыкі і інфарматыкі пакуль не складваецца: план набору — 70, а дакументы прынеслі толькі 37 чалавек.

Добры конкурс пакуль складваецца на "Псіхалогію" — тут крыху менш за два чалавекі на месца.

А самая папулярная спецыяльнасць — "Арганізацыя і кіраванне фізічнай культурай": пры плане ўсяго ў 25 чалавек, заяву падалі ўжо 92 абітурыенты.

Вельмі сумныя балы ў Ваеннай акадэміі

Ахвотных стаць афіцэрам сёлета дастаткова, але на большасці конкурсу ўсё яшчэ няма.

Ды і наогул паступіць у Ваенную акадэмію вялікай працы не складае. За тры дні падачы дакументаў толькі шэсць абітурыентаў прынеслі заявы з баламі вышэй за 300.

Шалёны конкурс у Акадэміі МУС

У будучых міліцыянтаў канкурэнцыя больш сур'ёзная, чым у вайскоўцаў.

На факультэце крымінальнай міліцыі на спецыяльнасць "Правазнаўства" прынеслі дакументы ўжо 191 чалавек, пры тым што набор складае ўсяго 81.

У міліцэйскай ВНУ традыцыйна вялікі конкурс на жаночыя спецыяльнасці. Напрыклад, на "Правазнаўства" на крымінальна-выканаўчым факультэце ўжо прынеслі дакументы 35 чалавек, пры наборы ў 10.