У экс-дэпутаткі Васілевіч і асабістай доктаркі Лукашэнкі новы бізнес
Асяроддзе Аляксандра Лукашэнкі зарабляе грошы на прыгажосці / Скриншот с сайта
Экс-дэпутатка Марыя Васілевіч і асабістая доктарка-анестэзіёлаг Аляксандра Лукашэнкі Алена Казак заснавалі кампанію, якая займаецца пастаўкамі медыцынскага абсталявання для клінік і б’юці-салонаў. Акрамя продажаў, яна займаецца навучаннем спецыялістаў працы на гэтым абсталяванні. Пра гэта стала вядома журналістам “Бюро”.
Кампанія набліжаных да Лукашэнкі асобаў прадае апаратуру для эстэтычнай медыцыны, касметалогіі, дэрматалогіі і гінекалогіі з Расіі, Паўднёвай Карэі і Іспаніі.
Блізкія кантакты асяроддзя Лукашэнкі
Алена Казак не пачатковец у індустрыі прыгажосці. У 2024 годзе яна стала адзінай уладальніцай салона Antiage Clinic, які прапануе працэдуры па амаладжэнні, касметалогіі і дэрматалогіі.
Сярод важных асобаў, звязаных з салонам, — Наталля Садоўская, кіраўніца асацыяцыі рэстаратараў і спадчынніца буйнога рэстараннага холдынгу. У 2020 годзе яна прысутнічала на тайнай інаўгурацыі Лукашэнкі.
“Бюро” звяртае ўвагу, што Antiage Clinic раней называўся “Айрыс” і належаў асабістай доктарцы Лукашэнкі Святлане Канашэнка, яе сястры, дэвелаперу і хакеісту з каманды Лукашэнкі Паўлу Беламу.
