Лукашэнка незадаволены беларусамі, якія абурыліся адключэннем ліхтароў
Цёмныя вуліцы Мінска / фота з сацсетак
Лукашэнка выказаўся наконт беларусаў, незадаволеных адключэннем вулічнага асвятлення ў цёмны час сутак. Ён заявіў, што ў маштабах краіны гэта "дае значную эканомію" грошай.
Гэтую эканомію за год ён параўнаў з выдаткамі на павышэнне пенсій па ўсёй краіне ці будаўніцтва трох малочна-таварных комплексаў.
Паводле Лукашэнкі, у Мінску старшыня гарвыканкама Уладзімір Кухараў скараціў працу вулічных ліхтароў на 10-15 хвілінаў: "Кухараў на 15 хвілін або на 10 нават святло выключыў раней — божа мой, з Украінай параўналі".
Насамрэч, вулічнае асвятленне ў Мінску не выключылі, а ўключылі пазней — праз гадзіну пасля заходу сонца. У выніку людзі вярталіся з працы ў час пік у цемры. У тым ліку не працавалі ліхтары каля пешаходных пераходаў і г.д. Пасля абурэння мінчукоў улады заявілі, што гэта была "разавая акцыя", і святло ўключылі ў звычайны час.
Тым не менш Лукашэнка настойвае на сваёй ідэі, што ў вялікіх гарадах дастаткова іншых крыніц асвятлення, акрамя вулічных ліхтароў. Праўда, цяпер ён прапанаваў "яшчэ раз прааналізаваць сітуацыю".
