Дзіцячыя сады і карупцыя: кампанія Riko працягвае працаваць у Беларусі

09/02/2026 - 16:50

Дзякуй за шчаслівае дзяцінства? / LookByMedia

У межах праграмы "Беларусь інтэлектуальная" на 2026–2030 гады ўлады плануюць прыцягнуць замежныя інвестыцыі славенскай кампаніі “Riko d.o.o.” на суму 72 446 000 рублёў. Асноўны аб’ём сродкаў плануецца асвоіць у 2026 годзе — 46 746 000 рублёў, яшчэ 25 700 000 рублёў — у 2027 годзе.

Грошы пойдуць на будаўніцтва аб’ектаў дашкольнай адукацыі. У Брэсце плануецца ўзвядзенне дзіцячага сада на 190 месцаў з басейнам. Яшчэ адзін дзіцячы сад на 100 месцаў з басейнам прадугледжаны ў горадзе Іванава.

У вёсцы Аколіца Мінскага раёна запланавана будаўніцтва дзіцячага сада на 100 месцаў з басейнам, а ў вёсцы Копішча — дзіцячага сада на 190 месцаў з басейнам.

Таксама ў горадзе Мсціслаў мяркуецца ўзвядзенне дзіцячага сада на 50 месцаў, уключна з праектна-пошукавымі работамі.

Усе аб’екты плануецца рэалізаваць з удзелам кампаніі “Riko d.o.o.” (Рэспубліка Славенія). Дакумент пастановы Савета Міністраў Беларусі знаходзіцца ў распараджэнні Еўрарадыё дзякуючы арганізацыі BELPOL.

Што не так з Riko

Нагадаем, што некалькі гадоў таму вакол славенскай кампаніі разгарэўся карупцыйны скандал. Паводле звестак "Бюро", Riko на працягу многіх гадоў атрымлівала ў Беларусі буйныя дзяржаўныя кантракты дзякуючы блізкім асабістым сувязям з сям’ёй Аляксандра Лукашэнкі, а таксама ўдзельнічала ў дачы хабару высокапастаўленаму чыноўніку.

Детсады за миллионы и коррупция: словенская Riko продолжает работать в Беларуси

Лістапад 2021 года. У Магілёўскім раёне ўрачыста адкрылі першую лічбавую падстанцыю, якую мадэрнізавала кампанія Riko (першы злева – кіраўнік прадстаўніцтва Riko ў Беларусі Жыварад Смількавіч, другі злева – міністр энергетыкі Беларусі Віктар Каранкевіч). Крыніца: belta.by

Нягледзячы на скандал, дзейнасць Riko ў Беларусі не пацярпела. Кампанія працуе ў краіне з пачатку 2000-х гадоў, рэалізуе энергетычныя праекты, пастаўляе абсталяванне дзяржаўным заводам — і за гэты час зарабіла сотні мільёнаў еўра.

У 2025 годзе яна працягвала ўводзіць у эксплуатацыю падстанцыі, апошні аб’ект быў здадзены ў снежні.

Журналіст-расследавальнік "Бюро" Аляксей Карпека, сааўтар матэрыялу пра дзейнасць Riko, адзначае:

"Мяркуючы па дакументах і адкрытых даных, кампанія спакойна працягвае будаўніцтва. Важна, што большая частка сродкаў, якія плануецца накіраваць на ўзвядзенне дзіцячых садоў, — гэта ўласныя грошы Riko. Фактычна гэта можа быць альбо аплата за раней атрыманыя прэферэнцыі, альбо аванс за будучыя заказы ў энергетыцы. Пры гэтым Riko займаецца не толькі будаўніцтвам, але і пастаўкамі абсталявання для заводаў".