Улады Беларусі засакрэцілі інфармацыю пра партнёрку ўнука Лукашэнкі

"Бюро" не змагло атрымаць інфармацыю з Адзінага дзяржаўнага рэгістра юрыдычных асоб і індывідуальных прадпрымальнікаў (АДР) пра бізнесы "Марскія сезоны" і "Марскі вектар" Людмілы Няронскай. Яна з’яўляецца партнёркай унука Аляксандра Лукашэнкі, Аляксандра Лукашэнкі-малодшага.

Раней журналісты-расследавальнікі таксама не змаглі атрымаць інфармацыю пра кампанію "Сезон упакоўкі", якой валодаюць Няронская і ўнук Лукашэнкі. У "Бюро" падазраюць, што недаступнымі могуць быць даныя і пра іншыя кампаніі Людмілы Няронскай.

Пасля скаргі ў адрас Міністэрства юстыцыі Беларусі на недаступнасць даных у АДР журналістам адказалі, што "вядзецца праца па ліквідацыі тэхнічных непаладак". Аднак з таго часу спіс кампаній з недаступнымі па іх данымі толькі павялічыўся.

"Марскія сезоны" — гэта кампанія, у якой працуе зяць Віктара Лукашэнкі. Яна будуе рыбаперапрацоўчы завод у свабоднай эканамічнай зоне "Віцебск" і карыстаецца шырокімі падатковымі і мытнымі льготамі.

Гэты інвестыцыйны праект уключылі ў дзяржаўную праграму "Аграрны бізнес" і выдзелілі льготны крэдыт у памеры 240 мільёнаў беларускіх рублёў на будаўніцтва завода.