"Віця, а нахера?" Блогер расказвае, як прыбраў Эйсманта з эфіру

24/01/2025 - 16:16

Віктар Малішэўскі vs парушальнікі Выбарчага кодэкса

Віктар Малішэўскі vs парушальнікі Выбарчага кодэкса / @rubanau_collage

Медыяэксперт і блогер Віктар Малішэўскі "прыбраў" з эфіраў Белтэлерадыёкампаніі давераных асоб Аляксандра Лукашэнкі.

Кіраўнік Белтэлерадыёкампаніі Іван Эйсмант, галоўрэд "Беларусь сегодня" Дзмітрый Жук і дырэктарка прадстаўніцтва МТРК "Мир" Вольга Шпілеўская неспадзявана забылі зазірнуць у Выбарчы кодэкс, калі сталі даверанымі асобамі.

Артыкул 46 кодэкса настойвае: журналісты і службовыя асобы СМІ не могуць весці тэлепраграмы ці ўдзельнічаць у асвятленні выбараў праз медыя, калі названыя асобы — кандыдаты ў прэзідэнты або іх давераныя асобы.

Але Эйсмант, Шпілеўская і Жук працягвалі хадзіць у "Клуб рэдактараў". Пакуль на гэта не звярнуў увагу Малішэўскі. Праз сайт "Обращения.бел" ён падаў гэтым медыяменеджарам знак — маўляў, па законе вы цяпер мусіце быць у адпачынку, а не ў эфіры. І ўсе трое сапраўды зніклі з "Клуба рэдактараў".

Пакуль што гэта адзінае дакументальна зафіксаванае парушэнне за ўвесь час выбарчай кампаніі, якое было прызнанае ўладамі.

Мусілі ўзяць адпачынак на час выбарчай кампаніі

— Спачатку я думаў, што проста напішу пра гэта пост для сацсетак. Але зразумела, што пост (нават калі яго хтосьці перадрукуе) нічога не зменіць. Таму я напісаў не толькі пост, але і зварот на сайт “Обращения.бел”. Напісаць туды можа кожны (праўда, трэба прайсці даволі складаны квэст, каб трапіць на гэты сайт, прарвацца праз усе верыфікацыі).

У мяне пайшло каля гадзіны, каб разабрацца, як там усё працуе. Але калі прадэманстраваць упартасць, то вам павінныя адказаць.

Дарэчы, рэгіструючыся на гэтым сайце, ты мусіць паведаміць, дзе жывеш: у Беларусі ці за межамі краіны. Я адзначыў, што жыву за межамі Беларусі, але ўсё роўна атрымаў адказ.

Адказ, зрэшты, не быў шматабяцальным: "Прынята да ведама". Але пазней аказалася, што і Эйсмант, і Жук, і Анастасія Шпілеўская зніклі з эфіру Белтэлерадыёкампаніі.

— Але фармальна па гэтым артыкуле Выбарчага кодэкса і Жук, і Эйсмант, і Шпілеўская як давераныя асобы аднаго з кандыдатаў наогул мусілі на час выбарчай кампаніі ўзяць адпачынак і нават не ўдзельнічаць у працы сваіх медыя. Ці ўзялі яны адпачынак, я не ведаю.

Усе гэтыя людзі вернуцца ў эфір адразу пасля выбараў, не сумняваецца Малішэўскі. Нейкіх асаблівых эмоцый гэтая перамога ў яго не выклікае. Бо, маўляў, ну што добрага ў тым, што закон парушаецца проста па звычцы?

— Яны нібы нават не задумваюцца пра тое, што ёсць нейкія законы і ў іх трэба глядзець.

У каментарах да паста Малішэўскага, у якім ён пераказваў гэтую гісторыю, успомнілі, што давераныя асобы Лукашэнкі не ўпершыню забываюць сысці з экранаў на час кампаніі. У 2015 годзе кіраўнік Белтэлерадыёкампаніі Генадзь Давыдзька нейкі час вёў "Клуб рэдактараў", пакуль хтосьці не ўспомніў пра закон і не замяніў яго тагачасным рэдактарам выдання "СБ. Беларусь сегодня" Паўлам Якубовічам.

— І вось прайшло 10 гадоў, і яны зноў "забылі". Наогул вельмі дзіўна, што Лукашэнка прызначае даверанымі асобамі менавіта рэдактараў. Па сутнасці, ён іх адпраўляе на няпэўны час у адпачынак. Фактычна не дае ім працаваць, звязваючы іх з сабой як давераных асоб. Гэта вельмі дзіўна.

“Віця, а нахера?”

Можна ўбачыць і іншыя парушэнні. Напрыклад, сустрэчу Лукашэнкі з яго даверанымі асобамі транслявалі ў навінах. Але хіба сустрэчы іншых кандыдатаў у прэзідэнты з іх даверанымі асобамі недзе транслявалі?

— Выходзіць, давераныя асобы Лукашэнкі адказваюць за інфармацыйную палітыку. То-бок яны пайшлі, пасядзелі на сустрэчы з ім, а потым яны ж пра гэта зрабілі сюжэт. Гэта парушэнне.

“Витя, а нахера?” Блогер рассказывает, как убрал Эйсмонта из эфира

Але хіба нехта публікаваў тэксты пра сустрэчы іншых кандыдатаў з даверанымі асобамі? / Euroradio

Карацей, калі вам, у адрозненне ад беларускіх уладаў, усё яшчэ "да законаў", вы можаце, назіраючы за выбарчай кампаніяй, нафіксаваць шмат цікавага.

— І было б нядрэнна, калі б хтосьці такія місіі браў на сябе час ад часу.

Але навошта? У каментарах да паста Малішэўскага ў Facebook спыталі яшчэ больш шчыра: "Віця, а нахера?"

— Але калі ты бачыш парушэнне закона, ты мусіш на гэта рэагаваць, — адказвае Малішэўскі для Еўрарадыё. — Зразумела, што рабіць гэта з Беларусі небяспечна. Не ведаю, ці пісаў бы я гэты зварот, калі б жыў у Беларусі. Магчыма, асцярогся б.