Лукашэнка пра ЗША: "Мы гатовыя з імі заключыць вялікую здзелку"

Аляксандр Лукашэнка заявіў пра гатоўнасць заключыць "вялікую здзелку" з ЗША. Ён загаварыў пра гэта падчас нарады па развіцці беларуска-амерыканскіх адносінаў.

"На адной чашы вагаў — іх пытанні, просьбы і патрабаванні. На іншай — нашыя пытанні і патрабаванні. Вырашаем. Давайце будзем вырашаць. Мы да гэтага гатовыя", — сказаў Лукашэнка чыноўнікам.

Падчас вераснёвага візіту ў Мінск прадстаўнік амерыканскага лідара Дональда Трампа Джон Коул заявіў, што ЗША ставяць мэтай нармалізацыю беларуска-амерыканскіх адносінаў. Адной з задач ён назваў вяртанне ў Мінск амерыканскага пасольства.

Пазней у размове з Guardian спецыяльны прадстаўнік Трампа па Украіне генерал Кіт Келаг раскрыў матывы сустрэч амерыканскіх прадстаўнікоў з Лукашэнкам. Паводле яго слоў, афіцыйны Мінск цікавіць Вашынгтон як патэнцыйны канал сувязі з Уладзімірам Пуціным.

Лукашэнка сёння зноў намякнуў на гатоўнасць паўдзельнічаць у перамовах па дасягненні міру ва Украіне.

"Калі амерыканцы хочуць урэгуляваць канфлікт ва Украіне і бачаць там нейкую невялікую нашу ролю, мы гатовыя ў гэтым удзельнічаць", — нагадаў Лукашэнка.