За два дні пратэстаў у Іране маглі загінуць да 30 тысяч чалавек

Толькі 8 і 9 студзеня на вуліцах Ірана маглі быць забітыя да 30 тысяч чалавек, піша BILD са спасылкай на часопіс TIME. Пра гэта паведамілі два супрацоўнікі Міністэрства аховы здароўя Ірана. Па іх словах, маштабы гібелі дэманстрантаў перавысілі магчымасці дзяржавы па вывезенню целаў: не хапала мяшкоў для трупаў, а замест машын хуткай дапамогі выкарыстоўваліся грузавікі.

Афіцыйная версія ўладаў Ірана істотна адрозніваецца. Рэжым аятол у Тэгеране 21 студзеня прызнаў 3117 загінулых. Незалежныя актывісты таксама называюць меншыя лічбы: агенцтва Human Rights Activists News Agency, якое базуецца ў ЗША, пацвердзіла 5459 смерцяў, яшчэ больш за 17 тысяч выпадкаў знаходзяцца на праверцы.

Тым часам лічба ў 30 тысяч супадае з унутранай статыстыкай, складзенай лекарамі і ратавальнікамі і што трапіла ў распараджэнне Time.

Па дадзеных, якія прааналізаваў германска-іранскі афтальмолаг Амір Параста, толькі за два дні было зафіксавана 30 304 загінулых, не ўлічваючы целы, дастаўленыя ў вайсковыя шпіталі і моргі.

Сведкі паведамляюць пра стральбу па пратэстоўцах, у тым ліку з дахаў і з вялікакалібернай зброі, а таксама пра поўнае адключэнне інтэрнэту, з-за чаго рэальны маштаб рэпрэсій застаецца невыяўленым.