У Мінск з'язджаецца спецтэхніка, на вуліцах — сілавікі і агароджы
Мінск / telegram
Сёння — 64-ы дзень пратэстаў у Беларусі. У Мінску чакаецца нядзельны марш гонару, а сілавікі з самай раніцы пачалі да яго рыхтавацца. На вуліцах сталіцы — спецтэхніка, аўтазакі і металічныя агароджы.
Цяжкую тэхніку па традыцыі сцягваюць да Палаца Незалежнасці. Праспект Пераможцаў перакрыты, Стэла абгароджана. Менавіта ў гэты раён падчас нядзельных пратэстаў звычайна напраўляюцца шматтысячныя калоны мітынгоўцаў.
Ачэплена таксама Кастрычніцкая плошча, праспект Незалежнасці патрулююць невялікія групы міліцыянтаў. Каля плошчы Незалежнасці заўважаныя машыны сістэмы "Рубеж". На вуліцы Мяснікова — аўтазакі і аўтобусы з сілавікамі.
Таксама шмат сілавікоў і спецтэхнікі заўважылі каля філармоніі. Перакрытая вуліца Макаёнка, дзе знаходзіцца будынак "Белтэлерадыёкампаніі". Гандлёвы цэнтр "Галерэя Мінск" зачынены сёння "па тэхнічных прычынах".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
