Скандал у мінскай кавярні "Маркс". Мастачцы забаранілі маляваць акварэллю?

06/11/2025 - 13:40

У кафэ Marks / yandex.by

"Прыйшла паскетчыць і папіць кавы, а афіцыянтка падышла і сказала перастаць маляваць акварэллю".

У мінскай кавярні "Маркс" адбыўся канфлікт паміж адміністрацыяй і групай мастачак. Пра гэта ў сацыяльнай сетцы Threads напісала адна з наведвальніц. Па словах дзяўчыны, пасля таго як там заўважылі, што яна нешта малюе "вадараспушчальнай фарбай", да яе падышла афіцыянтка і папрасіла перастаць гэта рабіць.

Дзяўчына здзівілася, маўляў, малявала акуратна, фарба змываецца. У чым праблемы? Чаму ёй і сяброўкам прыйшлося шукаць у выніку больш "прыязную" ўстанову?

Рэакцыя ў каментарах падзялілася.

Адны карыстальнікі сацсеткі падтрымалі аўтарку паведамлення, маўляў, акварэль не пахне, а верагоднасць таго што яна нешта запэцкае — такая ж, як ад пралітай кавы. Іншыя звярнулі ўвагу на тое, што не кожная акварэль не пахне, і падкрэслілі, што гаворка ішла не пра адну дзяўчыну і сітуацыя больш нагадвала майстар-клас і "спажывецкі экстрэмізм па цане аднаго кубка кавы".

— Яны сапраўды выкарыстоўвалі акварэль і ваду, пры гэтым бралі пітныя шклянкі, якія звычайна прызначаныя для гасцей, — жахнулася адна са сведкаў гэтай гісторыі.

— У наступны раз схадзіце ў абутковую краму маляваць. Або да крамы з агароднінай. Таксама нядрэнныя лакацыі, — параіў яшчэ адзін карыстальнік Threads.

— Я шыць люблю — можна я вазьму швейную машынку і сукенка сабе пашью?

— На месцы кавярні я б звярнулася ў адпаведныя органы, каб абяліць сваю рэпутацыю і каб у наступны раз такія, як вы, спачатку думалі, перш чым займацца адкрытым паклёпам, — адрэагавала яшчэ адна дзяўчына.

Хтосьці стаў напрошвацца на каву і вязанне ў госці да аўтаркі паста.

— А што?

Скандал в минском кафе “Маркс”. Художнице запретили рисовать акварелью?

Настольныя гульні ў кафэ

Журналісты Еўрарадыё таксама разышліся ў меркаваннях наконт гэтай гісторыі.

Калі гаворка не ідзе пра майстар-клас, за які ўдзельніцы плацілі грошы (дзяўчына, якая распавяла гісторыю, называе мерапрыемства бясплатнай "творчай сустрэчай"), тады чым гэтыя пасядзелкі адрозніваюцца ад таго, калі людзі збіраюцца ў кавярнях вялікімі кампаніямі і гуляюць у настольныя гульні або чытаюць-абмяркоўваюць гадзінамі кнігі, працуюць за ноўтбукамі?

Хтосьці заўважыў, што наведвальнікі павінны быць эмпатычнымі, маўляў, чатыры гадзіны на маляванне (пра якія, як высветлілася, заяўляла арганізатарка сустрэчы ў сябе ў сацсетках) — гэта занадта. Калі наведвальнікі не робяць заказаў, якія прыносяць установе грошы, яны павінны разумець, што займаюць месцы тых, хто дапаможа кавярні зарабіць.

З іншага боку, чым гэта рэгулюецца?..

Усе пагадзіліся, што карыстацца службовым посудам пры маляванні — як мінімум, небяспечна.

А што думаюць на гэты конт уладальнікі устаноў грамадскага харчавання?

Каб разабрацца, мы пагаварылі з беларусамі, якія мелі дачыненне да рэстараннага бізнесу ў нашай краіне.

— Што адчуваюць работнікі кавярні, калі ў яе прыходзяць людзі, замаўляюць па-мінімуму, а сядзяць доўга? Ну нянавісці няма, таму што тут шмат нюансаў. Калі гэта дзень і ўсё пуста — дык хай працуюць і ствараюць масавасць. Калі час пік і месцаў не хапае — то так, не асоба прыемна. І гэта тычыцца не толькі кафэ. Напрыклад, "мажорныя" рэстаранчыкі ў цэнтры Мінска не асабліва радыя дзяўчынкам з вялікімі вуснамі, якія сядзяць увесь вечар з адным куфлем, і хлопчыкам у паленым Armani з кубкам кавы таксама. Вядома, такое стаўленне да наведвальнікаў можа здацца негасцінным, але — с'est la vie, такі бізнэс.

— Калі б дзяўчаты выкарыстоўвалі для змывання фарбаў аднаразовыя шклянкі, ніякіх праблем, думаю, не было б. Шкло і кераміка ва ўстановах грамадскага харчавання прызначаныя для харчовых прадуктаў, таму адназначна карыстацца імі ў іншых мэтах нельга. Хто ведае, што змяшчаецца ў гэтых фарбах — свінец, мыш'як?.. Мы ж не правяраем!

— У гэтым выпадку мы назіраем за парушэннем закону аб абароне правоў спажыўца і адміністрацыйнага кодэкса ў частцы грамадскага парадку. Зразумела, што спажывец мае права знаходзіцца ва ўстанове ў рэжыме яго працы, але з іншага боку, кафэ аказвае паслугу грамадскага харчавання і можа звярнуцца ў міліцыю, калі яго правы неяк ўшчамляюць. У выпадку платнага майстар-класа мы гаворым аб камерцыйнай дзейнасці, якая адназначна павінна суправаджацца дамоўнымі адносінамі паміж наведвальнікамі і адміністрацыяй установы, так як тут гаворка ўжо не пра спажыўцоў.

У кафэ / unsplash.com

Кароткая выснова: адназначнага адказу на тое, як адрэагуюць ўладальнікі устаноў грамадскага харчавання на вашы творчыя сустрэчы, няма. Калі вам хацелася б правесці час з сябрамі за агульным хобі, вы можаце ўдакладніць у адміністрацыі, ці магчыма гэта. Вельмі верагодна, што адказ будзе станоўчым — асабліва, калі вы зберацеся не ў час пік.

Калі мерапрыемствы носяць камерцыйны характар, арганізатары абавязаны абмеркаваць умовы з уладальнікамі устаноў.

Карыстацца службовым посудам не па прызначэнні забаронена.

P.S. Каментуючы паведамленне мастачкі, карыстальнікі сацыяльнай сеткі Threads звярнулі ўвагу на тое, што скаргі з нагоды "негасцінных" адносін у "Марксе" з'явіліся і ў водгуках на ўстанова ў пошукавых сістэмах, накшталт Яндэкс.

— Калі вам напхалі тут — гэта не значыць, што вам не напхаюць там, — папярэджваюць каментатары.