Памёр аўтар знакамітага "Стэнфардскага турэмнага эксперыменту"

У Сан-Францыска памёр 91-гадовы Філіп Зімбарда. Пра гэта распавялі ў Стэнфардскім універсітэце, дзе псіхолаг працаваў выкладчыкам больш за 50 гадоў.

Самай знакамітай яго працай стаў сумна вядомы "Стэнфардскі турэмны эксперымент". Яго праводзілі ў падвале ўніверсітэта, які пераабсталявалі ў "турму". Тут на працягу некаторага часу добраахвотнікі гралі ролі ахоўнікаў і зняволеных.

"Зняволеныя" і "ахоўнікі" даволі хутка прыстасаваліся да сваіх роляў. У імправізаванай турме пачалі ўзнікаць небяспечныя сітуацыі.

За кароткі час некалькі "ахоўнікаў" ператварыліся ў сапраўдных садыстаў. Асаблівая жорсткасць праяўлялася ўначы, калі ім здавалася, што відэакамеры выключаныя. У выніку “зняволеныя” былі моцна маральна траўміраваныя, і двое выйшлі з эксперымента раней часу.

Праца праводзілася на працягу шасці дзён, пасля чаго эксперымент спынілі па этычных матывах, хаця першапачаткова ён быў разлічаны на два тыдні.