У пракуратуры Польшчы назвалі прычыны смерці Мікіты Мелказёрава
Мікіта Мелказёраў / Еўрарадыё
У пракуратуры Польшчы расказалі аб прычынах смерці журналіста Мікіты Мелказёрава.
Падчас ускрыцця цела былі выяўленыя змены, выкліканыя хранічным захворваннем, перадае "Белсат". Пра якое менавіта захворванне ідзе гаворка, у пракуратуры не ўдакладнілі.
Як паведаміў прэс-сакратар акруговай пракуратуры Варшавы Пётр Антоні Скіба, даследаванні паказалі, што смерць наступіла не ў выніку траўмы. Справа аб ненаўмысным забойстве была прыпыненая да канчатковага медыцынскага заключэння па выніках судова-медыцынскай і таксікалагічнай экспертызы.
Блогер і журналіст Мікіта Мелказёраў памёр ва ўзросце 37 гадоў у ноч на 21 снежня. Самымі вядомымі яго праектамі былі "Жыццё маліна" і "Загляне сонца".
