МУС дадало ў спіс "экстрэмістаў" яшчэ 70 чалавек
"Экстрэміст" Сяргей Гардзіевіч да і пасля зняволення / калаж "Нашай Нівы"
14 лістапада Міністэрства ўнутраных спраў дадало ў "экстрэмісцкі спіс" яшчэ 70 чалавек. Цяпер у ім 1784 прозвішчы. Гэта беларусы і грамадзяне іншых дзяржаў, якія пераследаваліся ці пераследуюцца па палітычных матывах.
Трапіць у спіс могуць не толькі тыя, каго шукаюць або асудзілі. Фігурантам спісу можна стаць нават пасля адбытага пакарання. Напрыклад, у спіс трапіў палітзняволены журналіст інтэрнэт-выдання "Першы рэгіён" Сяргей Гардзіевіч. Сёлета ў кастрычніку ён ужо быў вызвалены пасля адбыцця прысуду.
Таксама ў лік "экстрэмістаў" трапіў віцяблянін Аляксей Рэзнікаў, асуджаны сёлета на 4,5 года калоніі за посты і рэпосты ў сацыяльных сетках. У верасні яго ж унеслі ў "спіс тэрарыстаў".
МУС дадае людзей у "спіс экстрэмістаў" дзясяткамі і сотнямі. Самае вялікае папаўненне спісу адбылося 28 кастрычніка: тады ён павялічыўся адразу на 625 прозвішчаў.
