"Лавіце, су*і, вожыка ў штаны". Рэакцыя прапаганды на вызваленне Ціханоўскага

21 чэрвеня на волю выйшаў палітвязень Сяргей Ціханоўскі. Яго вызваленне стала галоўнай падзеяй у беларускай медыяпрасторы.

Не засталіся ўбаку і прапагандысты, якія таксама выказваліся на гэты конт.

Еўрарадыё паглядзела, што пісалі праўладныя журналісты і блогеры аб вызваленні Сяргея Ціханоўскага (спойлер: амаль усе ўпэўненыя, што ён разваліць дэмсілы).

Ігар Тур: амерыканцы хацелі такім чынам "прыстрэліць апазіцыю"

Прапагандыст АНТ у сваім тэлеграм-канале заяўляе, што Лукашэнка вызваліў Ціханоўскага з мэтай расколу апазіцыі.

Прывёў паведамленні ад нібыта сваёй крыніцы ў дэмсілах, маўляў, Лукашэнка паступіў мудра і "беглым" цяпер дакладна канец.

"Дапоўню толькі, што трапленне Ціханоўскага ў спіс вызваленых ад амерыканцаў кажа пра тое, што яны ці неглыбока разумеюць палітычныя рэаліі ў Беларусі, або — былі згодныя ўключэннем Сярожы ў гэты спіс з прапановай Мінска прыстрэліць (вобразна) гэтага кульгавага сабаку пад назвай "беларуская апазіцыя". Упэўнены, што хутчэй — другое".

Рыгор Азаронак: "Лавіце, су*і, вожыка ў штаны"

Наратыў аб развале ў апазіцыі ў сваім стылі паўтарыў і прапагандыст СВ Рыгор Азаронак.

"Лавіце, су*і, вожыка ў штаны", — напісаў Азаронак, намякаючы на тое, што Ціханоўскі цяпер усё пазнае і навядзе смуту ў апазіцыі.

"Ці крыўдна мне, што Ціханоўскі і Лосік не здохлі, як сабакі? Але ж яны яшчэ здохнуць менавіта так. Забытыя, выкінутыя. З іх не зробяць велікамучанікаў, таму што яны не выпусцяць дух у турме. Ціханоўскі даведаецца шмат новага пра сваю жоначку. Зноў пачне яе біць. А можа проста сап'ецца. Лосік звар'яцее і павесіцца натуральна ў абасаных штанах, ніхто не дапаможа, бо не будзе побач назіральнікаў". 

Аляксандр Шпакоўскі: "Мы нават не заўважым камарыных укусаў ад чарговых "збеглых"

Шпакоўскі не дае адназначнай ацэнкі таго, што вызваленне Ціханоўскага пасварыць лідараў дэмсіл або што, наадварот, зробіць іх больш згуртаванымі.

Ён сцвярджае, што шкоды "ад экстрэмістаў, якія выйшлі на свабоду" не будзе, калі беларускае грамадства "сапраўды з'яўляецца згуртаваным, арганізаваным, ідэйным, патрыятычныя СМІ накіроўваюць інфармацыйны парадак, а праваахоўны блок эфектыўна абараняе бяспеку дзяржавы, то мы нават не заўважым камарыных укусаў ад чарговых "збеглых".

Тады лагічнае пытанне да Аляксандра: калі ад палітвязняў няма шкоды, то навошта яны дагэтуль сядзяць у турмах? 

Рэакцыя прапагандыстаў АТН

Адразу пасля вызвалення Сяргея Ціханоўскага ў канале АТН з'явілася рэакцыя: "У Беларусі не прынята раскідвацца казырамі дзеля мясцовай палітычнай драмы — іх берагуць для аджпаведнага моманту. І гэты момант наступіў".

Козырам яны, верагодна, называюць Сяргея, акрамя гэтага, згадваецца, што такіх "козыраў" у Лукашэнкі яшчэ шмат, напэўна, намякаючы на іншых палітвязняў.

У абразлівай форме ў пасце гаворыцца, што ўсе 5 гадоў дэмсілы збіралі грошы пад Ціханоўскага. А цяпер, маўляў, надышоў момант, калі "Бацька перайграў і знішчыў".

Мяркуючы з гэтай пасады афіцыйнага тэлеканала, палітвязні для Лукашэнкі не што іншае, як тавар.

А што там інфаказачка?

Гарадзенская інфаказачка выхадам Сяргея Ціханоўскага на волю, здаецца, засмуцілася.

Яна нагадала, што Ціханоўскі ў Беларусі быў прызнаны тэрарыстам, а яе паплечнікаў нібыта судзяць за экстрэмізм.

"На беларусаў, якія ў 2020 г. у адкрытую выступілі за Лукашэнку і супраць спробы дзяржаўнага перавароту, узбуджаюцца справы аб экстрэмізме. Гэтыя асобы падвяргаюцца пераследу ўнутры краіны. Частка з іх прыняла рашэнне пакінуць Беларусь".

А яшчэ яна выказала здагадку, што праз вызваленне Ціханоўскага данаты пацякуць да дэмсілаў ручаём. Карацей, незадаволеная Вольга.