Кампанія Conte абвяргае звесткі, што шукае новы "твар брэнду" замест Хіжынковай
Кампанія Conte абвяргае звесткі пра тое, што новым тварам іх брэнду будзе расійская гімнастка і тэлевядоўца Ляйсан Уцяшава.
"Супраца з Ляйсан Уцяшавай адбываецца ў межах дзейнае рэкламнае кампаніі з брэндам LYCRA®. Кампанія Conte&LYCRA® адбываецца другі год. Ляйсан Уцяшава не з'яўляецца новым тварам брэнду Conte", — адказала тэлеканалу "Белсат" прэс-служба Conte.
Журналісты спыталіся, чаму Conte не падтрымала Вольгу Хіжынкову, якая другі месяц сядзіць за кратамі і даўно з'яўляецца тварам кампаніі. Таксама ў кампаніі спыталіся, як яна рэагуе на флэш-моб "Я/мы Хіжынкова", які пачалі беларусы ў сацсетках. На гэта прэс-служба заявіла, што не мае паўнамоцтваў адказваць на пытанні.
Міс Беларусь-2008 Вольга Хіжынкова знаходзіцца пад адміністрацыйным арыштам з 8 лістапада. Ужо за кратамі над ёй адбыліся два суды, якія дадавалі ёй суткі арышту. Паводле апошняга прысуду Хіжынкова павінна выйсці на волю 20 снежня.
Пасля таго як у афіцыйных сацсетках Conte з'явілася фота Ляйсан Уцяшавай, у каментарах сталі масава пытацца, чаму кампанія не падтрымлівае Хіжынкову. Гучалі нават заклікі да байкоту кампаніі. У выніку Conte проста закрыла каментары да гэтага фота.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
