Футбольнага каментатара звольнілі за крытыку стадыёну
Уладзімір Майсюк параўнаў баранавіцкі стадыён “Лакаматыў” з калгасным полем.
Такую характарыстыку спартовай пляцоўцы ён даў у артыкуле “Прафесія — каментатар”, апублікаваным у мясцовай газеце Intex-press. Праз тыдзень пасля публікацыі яго адхілілі ад працы каментатара футбольных матчаў, інфармуе выданне.
Уладзімір Майсюк сказаў, што футбольнае поле на “Лакаматыве”, “як у калгасе”, а праца стадыёну скіраваная болей на збіранне грошай за арэнду памяшканняў, чым на развіццё спорту.
Дырэктар стадыёну Леанід Пячко не стаў каментаваць звальненне каментатара і параіў звярнуцца ў ФК “Баранавічы”, бо Майсюк афіцыйна працуе там прэс-сакратаром. Але і там не сталі тлумачыць прычыны звальнення. Дырэктар клуба Андрэй Хлебаслоў толькі некалькі разоў паўтарыў, што крытыка ў артыкуле была неканструктыўнай: улады павярнуліся тварам да клуба, і каманда не кінутая на волю лёсу.
Уладзімір Майсюк каментаваў футбольныя матчы ў Баранавічах 20 гадоў.
