Топ-футбаліст з “экстрэмістскага” спісу шукае клуб за мяжой

03/01/2026 - 12:55

Андрэй Салавей / Tribuna

Беларускі футбаліст Андрэй Салавей сёлета стаў другім бамбардзірам Чэмпіянату Беларусі, забіўшы 16 мячоў за “Славію”. Цяпер жа, як высветліла “Трыбуна”, ён збіраецца пакінуць каманду і знайсці клуб за мяжой.

Выданне звяртае ўвагу, што гэта выглядала немагчымым праз палітычны пераслед спартоўца. У канцы 2024 года Салаўя і яго жонку ўнеслі ў рэжымны спіс “экстрэмістаў”. Іх асудзілі на два гады “хатняй хіміі”, выявіўшы на фота з мірных пратэстаў 2020 года.

Гэта не стала перашкодай трэніровачнаму працэсу футбалісту і ўдзелу ў спаборніцтвах. Дзякуючы заступніцтву галоўнага трэнера Івана Біёнчыка ад Салаўя не адвярнуліся ў “Славіі”, а зусім наадварот. Яму далі новы кантракт на райнешых умовах — каля 1,6 тысячы долараў у месяц.

“Трыбуна” лічыць, што такія добрыя ўмовы для “палітычнага” сталі магчымымі праз тое, што клубам апякуецца кіраўнік нафтаперапрацоўчага завода Віталь Паўлаў, “дэпутат і ў цэлым уплывовы ў горадзе чалавек”.

“Трыбуна” даведалася, што Салаўю дапамаглі зусім вызваліцца ад абмежаванняў.

“Біёнчык хадайнічаў за гульца, клубныя функцыянеры далучыліся. Прыклаў намаганні і Паўлаў – у выніку за футбаліста папрасілі нават кіраўнікі выканкама Лукашэнкі па Мазырскім раёне. Ну а чаму б не дапамагчы, калі форвард з самага пачатку ЧБ-2025 стаў рэгулярна забіваць (у тым ліку 13 красавіка дапамог эфектна разграміць мінскае “Дынама” 3:0), а каманда ў тым ліку дзякуючы яго галам замацавалася ў тройцы”, — піша спартыўнае выданне.

“Трыбуна” робіць выснову, што ў выніку ўсяго гэтага Салавей і яго жонка трапілі ў спіс “памілаваных” Аляксандрам Лукашэнкам да 17 верасня.

Пасля “бронзы” для “Славіі” футбаліст атрымаў ад клуба прапанову падоўжыць кантракт на палепшаных умовах. Але, маючы магчымасць выбару, Салавей не прыняў яе. Пра гэта мімаходам распавёў трэнер Біёнчык у апошнім інтэрв’ю.

Як высветліла “Трыбуна”, 31-гадовы футбаліст мае прапановы і ў Беларусі, але хоча з’ехаць за мяжу – пакуль не позна, на фоне добрай статыстыкі сезона атрымаць шчодры кантракт і зарабіць на будучыню.

“Пры гэтым у “Славіі” не расчараваныя гульцом і не маюць да яго прэтэнзій – разумеюць яго фінансавае імкненне і нават жадаюць удачы. Больш за тое, ёсць вусная дамоўленасць: калі Салавей не знойдзе прапаноў, дзеля якіх будзе гатовы з’ехаць, то ўсё ж падпішацца з мазыранамі. Па словах нашых крыніц, там такое развіццё падзей успрымуць з радасцю”, — піша “Трыбуна”.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.