Жыхароў Хойнікаў да будаўніцтва ядзернага могільніка рыхтуюць цішком — Флагшток

У Хойніцкім раёне ўлады ладзяць сустрэчы з насельніцтвам наконт магчымага будаўніцтва могільніка радыеактыўных адходаў БелАЭС у вёсцы Навасёлкі.

11 лютага,  як піша выданне "Флагшток", такая сустрэча прайшла ў ААТ "Хойніцкі завод гідраапаратуры". Наступная запланаваная на 19 лютага ў Паселіцкім сельвыканкаме. Такія ж мерапрыемствы плануюцца ў Астравецкім раёне Гродзенскай вобласці і ў Мсціслаўскім раёне Магілёўскай вобласці.

Пры гэтым ніякіх публічных анонсаў пра такія сустрэчы не з'яўляецца. Няма звестак на раённых дзяржаўных рэсурсах, таму зацікаўленыя людзі не могуць узяць удзел у абмеркаванні. Няма ніякай інфармацыі на гэтую тэму і на сайце Беларускай арганізацыі па абыходжанні з радыеактыўнымі адходамі (БелРАА).

Газета Хойніцкага райвыканкама расказала пра першае такое абмеркаванне. Але пасля гэтага даваць інфармацыю перастала. У тг-канале БелРАА гаворыцца, што "дыялог атрымаўся гранічна прадметным", а "пытанні былі ў лоб":

Дзе насельніцтва гатова прыняць праект?
Чаму РФ не забірае нашы РАА?
Дзе браць дэфіцытных спецыялістаў?
Што з маніторынгам старых ПАОД (сродкі прафесійнай абароны органаў дыхання)?
Ці стане медыцына ў рэгіёне лепшай?

Але адказы ў публікацыі не прыводзяцца. "Флагшток" даведаўся, што на сустрэчы былі напружаныя дэбаты.