У Беларусі пачалася падрыхтоўка да будаўніцтва трэцяга блока АЭС

У Беларусі пачалася падрыхтоўчая праца да будаўніцтва трэцяга энергаблока Астравецкай АЭС. Пра гэта заявіў міністр энергетыкі Дзяніс Мароз. Ён нагадаў, што адпаведнае рашэнне было прынятае на нарадзе ў Лукашэнкі 14 лістапада.

Міністэрства энергетыкі і профільныя дзяржаўныя органы сфармавалі план першачарговых мерапрыемстваў, рыхтуецца пакет міжнародных пагадненняў, якія плануюцца да падпісання з расійскім бокам. З кіраўніцтвам расійскай дзяржкарпарацыі "Расатам" абмяркоўваюцца фінансавыя, тэхналагічныя, арганізацыйныя аспекты па праекце.

Нагадаем, што першы энергаблок Беларускай АЭС увялі ў эксплуатацыю ў чэрвені 2021-га, а другі — у лістападзе 2023 года. Увесці ў дзеянне трэці блок плануецца ў 2035 годзе.

Паралельна вядзецца работа па вывучэнні перспектыў будаўніцтва другой АЭС — у Магілёўскай вобласці.

Таксама супраца з расіянамі працягваецца і ў рамках праекта па ўзвядзенню ў Беларусі пункта пахавання радыеактыўных адкідаў, заявіў міністр. Расійскія эксперты дапамагаюць беларускім калегам рыхтаваць кадры, асвойваць неабходныя кампетэнцыі, весці падрыхтоўку да будаўніцтва гэтага аб'екта.