Еўрапейскі суд па правах чалавека разглядае тры справы мігрантаў з Беларусі ў ЕС

У Еўрапейскім судзе па правах чалавека 12 лютага пачаліся слуханні трох спраў мігрантаў. Яны скардзяцца на дзеянні ўладаў Польшчы, Латвіі і Літвы, адкуль іх выціскалі ў Беларусь пасля спроб незаконнага перасячэння мяжы.

Скаргі згрупаваныя ў тры справы — па краінах, на якія скардзяцца мігранты, заўважыла Радыё Свабода. Сярод іншага заяўнікі падкрэсліваюць, што іх сілком вярталі ў Беларусь, "якая не з'яўляецца бяспечнай трэцяй краінай".

У першай справе — заявы чатырох кубінцаў, якія ў 2022 годзе з Расіі адправіліся праз Беларусь у Літву. Кубінцы кажуць, што з 31 сакавіка па 6 красавіка 2022 году яны некалькі разоў спрабавалі перайсці беларуска-літоўскую мяжу пешшу, а літоўскія памежнікі пад пагрозай зброі адціскалі іх назад у Беларусь. Пазней рашэннем суда іх затрымалі ў Літве без права выходзіць з памяшкання.

Другая справа датычыць 32 грамадзян Афганістана. Яны заяўляюць, што іх адціснулі ў Беларусь польскія памежнікі і пакінулі ў імправізаваных лагерах з праблематычнымі санітарнымі і гуманітарнымі ўмовамі.

У трэцяй справе былі аб'яднаныя заявы 26 грамадзян Ірака: іх вярнулі з Латвіі ў Беларусь без разгляду заяваў аб прытулку.

За некалькі дзён да пачатку слуханняў стала вядома, што ў другой справе 30 чалавек адмовіліся ад прэтэнзій да Польшчы. У трэцяй справе ад прэтэнзій да Латвіі адмовіліся чатыры курды з іракскім грамадзянствам. Тым не менш усе тры справы будуць разгледжаныя ў судзе.