Злучаныя Штаты прыпыняюць розыгрыш латарэі Green Card

Злучаныя Штаты прыпыняюць праграму DV1, у рамках якой разыгрывалася латарэя Green Card. Пра гэта заявіла міністр унутранай бяспекі ЗША Крысці Ноэм. Гэты крок яна патлумачыла жаданнем гарантаваць, "што ніводзін амерыканец больш не пацерпіць ад гэтай катастрафічнай праграмы".

Падставай для прыпынення выдачы грын-карт Ноэм назвала страляніну ў Браўнаўскім універсітэце ў Провідэнсе 13 снежня. Мужчына адкрыў агонь па студэнтах падчас падрыхтоўкі да іспытаў. Два чалавекі загінулі, дзевяць атрымалі раненні. Цела стралка — 48‑гадовага Клаўдыа Мануэла Невеса Валентэ знайшлі 18 снежня.

"Стралок з Браўнаўскага ўніверсітэта Клаўдыа Мануэл Невес Валентэ ўехаў у ЗША па іміграцыйнай візе ў межах праграмы латарэі разнастайнасці (DV1) у 2017 годзе і атрымаў грын-карту. Гэтаму жахліваму чалавеку ніколі не варта было дазваляць уезд у нашу краіну.

У 2017 годзе прэзідэнт Трамп дамагаўся спынення гэтай праграмы пасля разбуральнага наезду грузавіка ў Нью-Ёрку, здзейсненага тэрарыстам ІДІЛ, які ўехаў у краіну па праграме DV1 і забіў восем чалавек", — напісала Крысці Ноэм у сацсетках.

Штогод праз латарэю грын-карт разыгрываюць каля 50 тысяч іміграцыйных візаў (DV1). Пераможцы латарэі могуць прыехаць у ЗША і легальна жыць і працаваць там. Большая частка атрымальнікаў грын-карт застаюцца ў Штатах.