За заўвагу пра гучную музыку мінчука забілі, а цела засыпалі цэментам

У Мінску забілі мужчыну, а яго цела закапалі і засыпалі цэментам. Трагедыя адбылася сёлета ў кастрычніку, паведамляе Следчы камітэт.

Паводле інфармацыі следства, два браты, 54 і 60 гадоў, выпівалі дома і гучна слухалі музыку ў позні час. У нейкі момант адзін з мужчын пайшоў спаць. А неўзабаве да іх у кватэру пагрукаўся 35-гадовы сусед, які папрасіў пацішыць гучнасць і не шумець. Адзін з гаспадароў кватэры пачаў сварыцца з суседам. На крыкі выйшаў старэйшы з братоў, які нечакана ўзяў нож і некалькі разоў ударыў госця ў шыю. Удары аказаліся смяротнымі.

Праз некалькі дзён у міліцыю звярнулася маці мужчыны, якая заявіла пра яго знікненне. Жанчына расказала, што апошні раз бачыла сына ў дзвярное вочка, калі той ішоў да суседзяў.

"Следча-аператыўнай групай у смеццевым кантэйнеры паблізу дома выяўленыя рэчы зніклага са слядамі крыві. Акрамя гэтага, увагу міліцыянтаў прыцягнулі камеры відэаназірання ў пад'ездзе, становішча якіх з невядомых прычынаў аказалася змененым. Неўзабаве стала вядома, што мужчыны, да якіх падымаўся загінулы, з'ехалі", — паведамляюць у СК.

Неўзабаве братоў затрымалі. Выявілася, што мужчыны праз некалькі дзён вырашылі пазбавіцца ад цела загінулага. Яго закруцілі ў капу, вынеслі з кватэры і паклалі ў багажнік аўтамабіля. Потым яны паклалі забітага ў яму, выкапаную ў лесе каля іх лецішча, засыпалі цэментам і закапалі.

Следча-аператыўная група знайшла цела зніклага мужчыны на тым месцы, якое паказалі падазраваныя. На братоў пачалі крымінальную справу за забойства, здзейсненае групай асоб.