Якой будзе зіма ў Беларусі? Прагноз кліматолага

— Калі глядзець на зімовы сезон для Беларусі, паводле агульнаеўрапейскіх прагнозаў, пачатак зімы можа быць адносна мяккім — крыху больш цёплым за сярэдні ўзровень. Пры гэтым існуюць аргументы, што ў другой палове зімы з прычыны складаных атмасферных з’яў чакаецца павышаная верагоднасць халадоў і магчымых кароткіх халодных перыядаў. Што да ападкаў і снегу, то прагнозы нянадта аптымістычныя: чакаецца маласнежная зіма з дэфіцытам стабільнага снежнага покрыва.

Што будзе ў снежні, студзені і лютым?

Акрамя таго, паводле Уладзіслава Шумака, змена клімату і доўгатэрміновыя тэндэнцыі паказваюць, што зімы ў Беларусі становяцца ўсё больш мяккімі.

— Калі б мне давялося рабіць стаўку, то я б сказаў, што ў снежні будзе памяркоўная тэмпература — бліжэй да 0–2 градусаў. Магчымы мокры снег, снег з дажджом, але без стабільнага снежнага покрыва. У студзені будзе некалькі дзён з маразамі і снегам, але магчымыя і адлігі. Тэмпература будзе вышэйшая за сярэднекліматычную, і снег будзе хутка раставаць.

У лютым ёсць шанец на рэзкае пахаладанне — некалькі дзён сапраўднай зімы са снегам, але гэта будуць асобныя фазы. Ну і снежнае покрыва, хутчэй за ўсё, будзе нестабільнае — вялікага “снежнага пірага” не будзе.