Ушацкі міліцыянт адстрэльваўся ад п'яных хуліганаў і параніў аднаго
Супрацоўнік Ушацкага РАУС скарыстаў табельную зброю супраць двух п'яных грамадзян, якія спрабавалі прычыніць яму цялесныя пашкоджанні.
Як інфармуе БЕЛТА, каля дзвюх гадзін ночы міліцыянты атрымалі паведамленне, што ў вёсцы Кублічы на "Аўдзі" едзе нецвярозы кіроўца. Для праверкі на месца быў накіраваны экіпаж ДАІ, у склад якога ўвайшоў і ўчастковы інспектар міліцыі.
Праз гадзіну міліцыянты спынілі "Аўдзі", кіроўца паспрабаваў уцячы. Яго пераследваў супрацоўнік ДАІ, а ўчастковы застаўся каля спыненага аўтамабіля. Тым часам з машыны выйшлі два п'яныя і сталі пагражаць міліцыянту фізічнай расправай, а таксама хацелі забраць пісталет.
Хуліганы не рэагавалі на патрабаванні міліцыянта і паспрабавалі паваліць яго на зямлю, стукнуўшы яго некалькі разоў. Тады міліцыянт зрабіў некалькі папераджальных стрэлаў, а затым адным прыцэльным стрэлам параніў нападніка. Рана не звязаная з рызыкай для жыцця, адзначаюць у міліцыі.
На нападнікаў пачалі крымінальную справу. Аднаму з іх 28 гадоў, другому — 23.
Фота — kherson.pro
