У Жлобіне закрываецца легендарная фабрыка штучнага футра

У Жлобіне закрываецца легендарная фабрыка БЕЛФА — самы буйны ў Еўропе вытворца штучнага і ваўнянага футра на трыкатажнай аснове. Чуткі пра гэта ходзяць у райцэнтры ўжо з месяц, пішуць тг-каналы. Афіцыйнай інфармацыі, аднак, няма.

Штучнае футра з гэтай фабрыкі мясцовыя майстры выкарыстоўвалі для шыцця мяккіх цацак. У 2000-х гадах прадаўцы яркіх цацак масава абляплялі цягнікі на жлобінскім вакзале.

Фабрыка паспяхова працавала больш за 40 гадоў, але ў апошнія гады "вырабляла" пераважна страты, піша "Флагшток". Па выніках 2024 года чыстыя страты прадпрыемства сталі рэкорднымі — 3 млн 159 тыс. рублёў (больш за 1 млн долараў). Па выніках 2023 года страты склалі 2 млн 276 тыс. рублёў.

Журналісты "Флагштока" датэлефанаваліся на фабрыку ад імя пакупнікоў. Ім пацвердзілі, што вытворчасць спынілася, а прадпрыемства рыхтуюць да закрыцця: "Ліквідацыйны перыяд пачнецца з 11 жніўня. Працягнецца да 10 траўня з магчымым наступным падаўжэннем. Фабрыка ўжо нічога не робіць, вытворчасць стаіць. Работнікаў пераводзяць каго на 2/3, каго — за свой кошт".

Цяпер прадпрыемства распрадае прадукцыю, якая назапасілася на складах.