У лютым у Беларусі зафіксавалі не менш за 656 выпадкаў рэпрэсій
У Беларусі больш за 1200 палітвязняў / novychas.online
У лютым у Беларусі зафіксавалі не менш за 656 выпадкаў рэпрэсій (у тым ліку затрыманняў, ператрусаў). Гэта на паўтары сотні больш, чым было ў студзені 2025-га.
Як пішуць праваабаронцы "Вясны", "сітуацыя з правамі чалавека ў Беларусі застаецца вельмі цяжкай: працягваюцца рэпрэсіі супраць удзельнікаў пратэстаў 2020 года, а таксама пераслед іншадумцаў". Сілавікі па-ранейшаму адвольна затрымліваюць беларусаў "за рэалізацыю сваіх грамадзянскіх правоў".
На працягу лютага ў судах краіны разглядаліся крымінальныя справы ў дачыненні да як мінімум 304 абвінавачаных. Было вынесена не менш за 352 пастановы па адміністрацыйных справах.
Агулам, з 2020 года, як мінімум 8092 чалавек сутыкнулася ў Беларусі з крымінальным пераследам па палітычных матывах. У дачыненні да не менш за 6673 чалавек былі вынесеныя палітычна матываваныя прысуды.
