Трамп: Венесуэла паставіць ЗША да 50 млн барэляў нафты

Пераходныя ўлады Венесуэлы паставяць ЗША ад 30 да 50 млн барэляў "высокаякаснай нафты, якая знаходзіцца пад санкцыямі". Пра гэта абвясціў прэзідэнт ЗША Дональд Трамп у сваёй сацсетцы Truth Social 7 студзеня, перадае DW.

"Гэтая нафта будзе прададзеная па рынкавых цэнах, і грошы буду кантраляваць я як прэзыдэнт ЗША, каб гарантаваць, што яны пойдуць на карысць народу Венесуэлы і Злучаным Штатам", — напісаў Трамп.

Згодна з яго допісам, нафту з Венесуэлы будуць забіраць на судны-сховішчы і дастаўляць наўпрост да разгрузачных прычалаў у ЗША.

"Гаворка ідзе пра вялікія грошы", — канстатуе нямецкае агенцтва dpa. Нафтавыя запасы на тэрыторыі Венесуэлы з'яўляюцца найбуйнейшымі ў свеце. Да 2005 году гэтая краіна была для ЗША найбуйнейшым пастаўшчыком нафты, пакуль тагачасны кіраўнік венесуэльскай дзяржавы Уга Чавэс у 2007 годзе не правёў нацыяналізацыю прамысловасці, канфіскаваўшы, у тым ліку, маёмасць амерыканскіх кампаній, якія працавалі ў краіне.

Таксама Дональд Трамп запатрабаваў ад Венесуэлы разрыву эканамічных сувязяў з Расіяй, Кітаем, Іранам і Кубай. Пра гэта паведамляе ABC News са спасылкай на крыніцы.

Калі гэтыя патрабаваньні будуць выкананыя, Венесуэле будзе дазволена павялічыць здабычу нафты. Паводле словаў крыніцаў, дзяржсакратар ЗША Марка Рубіа заявіў 5 студзеня на закрытым брыфінгу, што ЗША здольныя "прымусіць Венесуэлу" пайсці на гэтыя крокі, бо яе нафтавыя танкеры перапоўненыя. Паводле Рубіа, у Венесуэлы ёсць усяго некалькі тыдняў, перш чым яна стане "фінансава неплацежаздольнай" без продажу сваіх нафтавых запасаў.