Сіноптыкі абвясцілі ў Беларусі чырвоны ўзровень небяспекі

У пятніцу, 9 студзеня, сіноптыкі абвясцілі ў Беларусі чырвоны ўзровень небяспекі. Прагназуюцца складаныя ўмовы надвор'я, выкліканыя паўднёвым цыклонам, цэнтр якога перамесціцца з тэрыторыі Украіны на Бранскую вобласць Расіі, паведамляе Белгідрамет.

Будзе пераважна хмарнае надвор'е. Часам чакаецца снег, на большай частцы тэрыторыі — моцны снег, уначы па паўднёвым усходзе краіны — вельмі моцны снег. У многіх раёнах будзе завіруха, на дарогах — снежныя заносы. На асобных участках дарог — галалёдзіца. Вецер прагназуецца паўночны, паўночна-ўсходні парывісты, у многіх раёнах — моцны парывісты, да 15-20 метраў за секунду. Уначы месцамі парывы ветру будуць дасягаць 24 метраў за секунду.

У Мінску чакаецца моцны снег, завея, на дарогах снежныя заносы, уначы — вецер парывамі 15-20 метраў за секунду.

Тэрмометры ўначы пакажуць ад -4 градусаў па паўднёвым усходзе да -16 па поўначы Беларусі. Удзень чакаецца 8-14 градусаў ніжэй за нуль, па паўднёвым усходзе краіны будзе 4-7 градусаў марозу.