У аўторак у Беларусі прагназуюць галалёдзіцу, а на праваслаўнае Раство — снег
Галалёд, ілюстрацыйнае фота
У аўторак, 6 студзеня, у Беларусі чакаецца воблачнае надвор'е, уначы — з праясненнямі, паведамляе Белгідрамет.
На большай частцы тэрыторыі краіны пройдзе снег, удзень па паўднёвым усходзе месцамі прагназуецца моцны снег. У асобных раёнах чакаюцца слабыя туман і галалёд, на дарогах месцамі — галалёдзіца. Сіноптыкі абвясцілі жоўты ўзровень небяспекі. Вецер уначы будзе няўстойлівы слабы, удзень — паўднёва-ўсходні, усходні ўмераны, месцамі — парывісты.
Тэрмометры ўначы пакажуць 5-11 градусаў ніжэй за нуль, удзень чакаецца -1...-7.
7 студзеня будзе хмарна, на большай частцы тэрыторыі краіны пройдзе снег, па паўднёвым усходзе ўдзень — з мокрым снегам. Вецер чакаецца пераменных кірункаў ад слабога да ўмеранага.
Тэмпература паветра ўначы складзе 5-12 градусаў марозу, удзень чакаецца 3-9 градусаў са знакам "мінус".
