Следчыя пачалі справу за забойства 18-гадовай дзяўчыны з Кобрыншчыны
Дзяўчына знікла сёлета ў жніўні.
Следчыя правялі агляд кватэры зніклай дзяўчыны, а таксама легкавога аўтамабіля, на якім рухаўся меркаваны злачынец. У выніку яны атрымалі доказы, што да злачынства спрычыніўся 25-гадовы малады чалавек, якога праваахоўнікі затрымалі.
Падчас следчых дзеянняў з удзелам падазраванага было высветлена, што забойства ён учыніў у лясным масіве за некалькі кіламетраў ад месца жыхарства дзяўчыны. Тамсама ён закапаў яе цела.
Цяпер высвятляюцца матывы і мэты злачынства, перадае БелаПАН. Па крымінальнай справе прызначаныя і праводзяцца ўсе неабходныя судовыя экспертызы.
Падазраванага ўзялі пад варту.
Ілюстрацыйнае фота — cxid.info
