Камітэт дзяржкантролю праверыў 54 школы Беларусі і ў кожнай выявіў парушэнні

Камітэт дзяржаўнага кантролю ў лістападзе–снежні 2025 года правёў праверкі 54 сярэдніх школ Беларусі па пытаннях арганізацыі харчавання і ва ўсіх выявіў парушэнні. Пра гэта гаворыцца ў лісце намесніка старшыні Камітэта Андрэя Лабовіча, які апынуўся ў распараджэнні арганізацыі BELPOL.

Так, у 50 школах парушалася санітарна-эпідэміялагічнае заканадаўства. У 27 школах была парушаная тэхналогія прыгатавання страў, выяўлены недакладкі сыравіны і недавесы.

У 25 школах не выконваліся натуральныя нормы харчавання і не выконвалася прыкладнае двухтыднёвае меню.

У 23 установах зафіксавана значная колькасць страў, якія былі спісаныя ў адходы.

У васьмі школах дапускалася рэалізацыя тавараў з пратэрмінаванымі тэрмінамі прыдатнасці.

У чатырох установах адукацыі ўстаноўлены факты прыхоўвання прадуктаў.

Па выніках праверкі Камітэт дзяржаўнага кантролю прыцягнуў да дысцыплінарнай адказнасці 90 чалавек. Траіх звольнілі.