Што не так з версіяй СК. Аэраразведчык пра дрона на Матусевіча

30/07/2025 - 15:40

Беспілотнік на вуліцы Матусевіча, Мінск / Следчы камітэт

Добраахвотнік-аэраразведчык з пазыўным Крот дапамог Еўрарадыё прааналізаваць фатаграфіі абломкаў беспілотніка, які днямі ўпаў у Мінску.

Шруба ад аднаго беспілотніка, крыло — ад іншага

Следчы камітэт выклаў фота меркаваных абломкаў. На здымках відаць крыло, якое належыць БПЛА самалётнага тыпу — гэта значыць, апаратам, якія вонкава нагадваюць самалёт з крыламі.

Беларускія сілавікі не ўдакладнялі паходжанне дрона. Але выклалі фота дэталі з надпісам на ўкраінскай мове: "Обережно, гвинт. Рухома частина " (Асцярожна, шруба. Рухомая частка). І такія дэталі выкарыстоўваюць у іншых тыпах дронаў — мультыкоптэрах, якія лётаюць за кошт вінтоў.

Что не так с версией СК. Аэроразведчик о дроне на Матусевича

Надпіс: "Асцярожна, шруба. Рухомая частка " / фота Следчага камітэта

— Гэтыя здымкі — відавочны ўкід. Дэталь, на якой напісана "Обережно, винт" — гэта прамень ад матора з прапелерам. Такія не ставяць на беспілотнікі самалётнага тыпу. Іх выкарыстоўваюць у звычайных дронах тыпу "Баба Яга" (нефармальная назва ўкраінскага цяжкага ўдарнага дрона), — звяртае ўвагу Крот.

Міністэрства абароны Беларусі паведаміла пра падзенне беспілотніка ў раёне Мінскай вуліцы Матусевіча ў ноч на 29 ліпеня. Днём Следчы камітэт выклаў відэа, зробленае з камеры назірання ў двары.

На відэа бачна, што дрон пачынае зніжацца, але кранае шматпавярхоўку і падае ўніз у двары дома. Дэтанацыі не было, хоць у Следчым камітэце сказалі, што беспілотнік быў нашпігаваны трацілам і металічнымі шарыкамі.

— Па гуку на відэа можна меркаваць, што беспілотнік збілі. На малюнку мы бачым, што ён падае носам уніз. Калі б у яго была баявая частка, адбыўся б выбух, — рэзюмуе Крот.

Чаму дроны залятаюць у Беларусь?

Гэта не першы беспілотнік з пачатку поўнамаштабнай вайны Расіі ва Украіне, які прыляцеў у Беларусь. Але першы, які даляцеў да Мінска.

Звычайна беспілотнікі, якія заблукалі, прылятаюць у Беларусь, таму што збіваюцца з маршруту пад уздзеяннем сродкаў радыёэлектроннай барацьбы, тлумачыць Крот. Гэта значыць радыёвыпраменьванне выкарыстоўваюць, каб заглушыць навігацыю варожага дрона, і той губляе курс.

— Не кожны дрон абсталяваны сістэмай барацьбы з РЭБ. Напрыклад, на расійскія "герані" ставяць платы, якія дапамагаюць змагацца з РЭБ, а на больш танныя дроны такія платы не ставяць. Таму яны могуць "губляцца".

Дроны будуць і далей губляцца над Беларуссю, пакуль ідзе вайна Расеі з Украінай. Украінская армія пастаянна ўдасканальвае сродкі РЭБ, а ў Расеі не сканчаюцца дроны.

— Тыя ж "Герберы" досыць танныя ў вытворчасці, іх робяць літаральна з фанеры і наносяць антырадыёлакацыйнае пакрыццё, каб іх было цяжэй выяўляць. А электроніка ў Расіі добрая, таму што праз шэрыя схемы закупак у іх дагэтуль ёсць доступ да мікрасхемаў. І гэта вельмі непрыемныя дроны, іх складана знайсці сістэмах СПА, на іх ліквідацыю трацяцца ракеты, і часта іх запускаюць роем (у якім могуць быць дронь-прынады без баявой часткі).

І так, дрон, які заблукаў над Беларуссю, з баявой часткай — гэта вельмі небяспечна.

— Ён можа здэтанаваць, і менавіта таму такія беспілотнікі збіваюць на падлёце, не даюць ім перасякаць мяжу.

Крот упэўнены, што беспілотнік не змог бы праляцець праз палову Беларусі і застацца не заўважаным вайскоўцамі.

— Нагадваю, што як толькі з боку Расеі заляталі "шахеды", Беларусь тут жа ўздымала авіяцыю, і іх збівалі. Цяпер мы маем справу са стоадсоткавай хлуснёй. Пытанне толькі ў тым, хто насамрэч запусціў гэты беспілотнік — беларускія ўлады самастойна — або з дапамогай Расіі.

Каб зразумець, які менавіта дрон разбіўся над Мінскам, трэба вывучыць яго астанкі. Калі сярод іх будуць мадэмы, камеры і слоты для сім-карт, хутчэй за ўсё, дрон ляцеў з разведвальнай місіяй.

Такія дроны могуць ляцець з даволі вялікай хуткасцю (больш 150 км/гадз). І ўсё ж у беларускіх сістэм СПА будзе час, каб заўважыць іх да таго, як беспілотнік падляціць да Матусевіча.