За "палітыку" асудзілі маладую фатографку з Баранавічаў
Паліна Верамяйчук / фота з яе старонкі Вконтакте
Прысуд паводле палітычных матываў атрымала 27-гадовая фатографка Паліна Верамяйчук. Дзяўчына родам з аграгарадка Сталовічы Баранавіцкага раёна, піша "Наша Ніва".
Верамяйчук скончыла факультэт фінансаў і банкаўскай дзейнасці Беларускага дзяржаўнага эканамічнага ўніверсітэта, атрымала спецыяльнасць фінансіста. Але жыццё звязала з творчасцю. Дзяўчына вядомая як фатографка, яна здымала ў Баранавічах і Мінску.
Вядома, што ў яе ёсць муж і зусім маленькае дзіця, народжанае ў ліпені 2025 года.
Калі менавіта да Верамяйчук прыйшлі сілавікі, дакладна невядома. Таксама невядома, ці была яна да суда пад вартай.
Ёй інкрымінавалі "садзейнічанне экстрэмісцкай дзейнасці" і асудзілі ў Брэсцкім абласным судзе на "хатнюю хімію". Хутчэй за ўсё, пераслед звязаны са "справай Гаюна".
