На пасаду кіраўніка федэрацыі футболу прэтэндуюць толькі людзі Кавальчука

Першы намеснік старшыні Беларускай федэрацыі футболу Андрэй Васілевіч зняў сваю кандыдатуру з выбараў кіраўніка БФФ. Ён быў чалавекам з каманды Мікалая Шарснёва, які сышоў у адстаўку пасля пераходу ў Адміністрацыю Аляксандра Лукашэнкі.

Цяпер на пасаду новага кіраўніка федэрацыі прэтэндуюць толькі людзі міністра спорту Беларусі Сяргея Кавальчука — гэта Яўген Булойчык і Андрэй Талмач. Такім чынам, барацьба за грошы УЕФА скончылася перамогай Кавальчука.

Што здарылася?

Еўрарадыё раней распавядала пра жорсткае супрацьстаянне паміж міністрам спорту Кавальчуком і кіраўніцтвам АБФФ у асобе Мікалая Шарснёва. Былы ахоўнік Лукашэнкі Сяргей Кавальчук з 2022 года актыўна ўмешваўся ў футбольную гаспадарку. Хоць па правілах УЕФА гэта строга забаронена і можа пацягнуць санкцыі супраць нацыянальнай федэрацыі — аж да адхілення клубаў і зборнай ад міжнародных спаборніцтваў.

Нягледзячы на тое, што Лукашэнка публічна падтрымаў Шарснёва, Кавальчук працягнуў закулісныя інтрыгі і дамогся таго, што беларускім футболам будуць кіраваць яго людзі.

Нагадаем, што выбары новага кіраўніка федэрацыі адбудуцца 17 ліпеня.

У якасці прыза — 10 мільёнаў еўра, якія штогод атрымлівае федэрацыя футболу ад УЕФА.