Калі ў Беларусі скончацца дажджы? Прагноз кліматолага

18/06/2025 - 12:33

Калі ў Беларусі скончацца дажджы? Прагноз кліматолага

Ужо больш за два тыдні, як у Беларусі наступіла лета, але па-сапраўднаму цёплага надвор’я няма. Тэмпература ў краіне занадта нізкая для чэрвеня, а дажджы і ўлевы, здаецца, сыходзіць не збіраюцца.

Што адбываецца з надвор’ем у Беларусі і калі прыйдзе лета, Еўрарадыё распавёў кліматолаг.

Чаму надвор’е такое нестабільнае?

Кліматолаг Уладзіслав Шумак лічыць, што такое надвор’е — не навіна для Беларусі, такім яно было і раней.

— Беларускае надвор'е заўсёды было пераменлівым, ніколі не было стабільных сезонаў. Змены заўсёды былі: і халодныя леты, і цёплыя зімы…

Але апошнія 20 гадоў у сувязі з глабальнымі зменамі клімату, змяняюцца і сезонныя тэндэнцыі. Перш за ўсё — гэта ссоўванні сезонаў.

Напрыклад, лета пачынаецца пазней і цягнецца амаль да канца верасня. А значыць, ссоўваюцца і восеньскія, і зімовыя, і вясеннія сезоны.

Шумак кажа, што змены клімату цяпер звязаныя з павялічанай колькасцю розных катастрафічных метэаралагічных з’яваў.

— Калі дождж ідзе, то адразу выпадае, напрыклад, паўмесячная норма ападкаў за дзень. Раней таксама гэта здаралася, але зараз колькасць такіх з’яў значна павялічылася. І будзе павялічвацца дыяпазон тэмператур менавіта ў летні перыяд: калі ў адзін дзень будзе градусаў 15, а ўжо праз дзень 30.

Хутка ў Беларусь прыйдзе спёка

Гэта будзе адбівацца як на жыцці людзей, так і на сельскай і лясной гаспадарцы.

Што адбываецца з надвор’ем наўпрост цяпер

Кліматолаг адзначае, што згодна з міжнароднымі метэаралагічнымі структурамі, наступныя два месяцы лета для нашай краіны будуць гарачымі.

— Асабліва гэта будзе чутно ў канцы ліпеня – пачатку жніўня. Будуць доўгія перыяды без дажджоў, без выпадзення ападкаў, і, канешне, гэта ўсё будзе адбівацца на навакольным асяроддзі.

Але спрагназаваць, калі менавіта лета стане больш цёплым, цяжка. Уладзіслаў Шумак кажа, што ў Беларусі вялікая праблема з сістэмай метэаралагічных назіранняў

— Яна не дазваляе вельмі хутка паведамляць пра наступленні гэтых з'яў, асабліва гэта тычыцца разбуральных ураганных вятроў і моцных ападкаў. Для гэтага павінна існаваць цэлая сетка добрых інструментальных метэаралагічных пляцовак, якія павінны паведамляць насельніцтву пра наступленні такіх з'яў.

І гэта ўсё можна рабіць, як паказвае ёўрапейскі вопыт. Лакальныя метэастанцыі могуць за 2-3 гадзіны паведамляць пра наступленне гэтых надзвычайных метэаралагічных з'яў.

А што будзе з ураджаем?

Што тычыцца ўраджаю, то цяперашняе надвор’е, на думку эксперта, будзе моцна ўплываць на запасы грунтовай вільгаці, што адаб’ецца і на сельскай гаспадарцы.

— Пра пладовыя культуры ўжо цяпер можна сказаць, што будзе недахоп, як і ягад. Таму што шмат чаго проста памерзла, а значыць, яно не дасць пладоў.

Зерневыя культуры больш устойлівыя, калі яны не вымерзлі, то дадуць ураджай.

А ўраджай бульбы будзе залежыць ад колькасці вільгаці ў глебе, таму што бульба будзе набіраць сілу менавіта дзякуючы вадзе. Калі вады будзе не хапаць, то яна будзе дробная.