Еўрапарламент прыняў рэзалюцыю пра "фальшывыя выбары ў Беларусі"

Дэпутаты Еўрапарламента 22 студзеня ўхвалілі рэзалюцыю пад назвай "Неабходнасць дзеянняў у барацьбе з працягам прыгнёту і фальшывых выбараў у Беларусі". За праект рэзалюцыі прагаласавалі 567 дэпутатаў, 25 — супраць, 66 — устрымаліся.

У рэзалюцыі звяртаецца ўвага на знішчэнне свабоды слова і лічбавы аштарытарызм рэжыму Лукашэнкі. "Паколькі рэжым выкарыстоўвае антыэкстрэмісцкія законы, каб перашкодзіць СМІ, у выніку чаго большасць незалежных СМІ былі прызнаныя "экстрэмісцкімі", прынамсі 45 прадстаўнікоў СМІ затрыманыя, каля 400 знаходзяцца ў выгнанні і іншыя сутыкаюцца з пераследам і дрэнным абыходжаннем; у той час як незалежныя СМІ, такія як Белсат, Хартыя 97, Nexta, Радыё Рацыя, Радыё Свабода ды іншыя адыгрываюць важную ролю ў падачы неабходнай інфармацыі і служаць пляатформай для дэмакратычных галасоў; тады як беларускія ўлады выкарыстоўваць сачэнне, анлайн-цэнзуру і дэзінфармацыю, эскалацыю лічбавага аўтарытарызму і падрыў перспектыў правядзення свабодных і справядлівых выбараў у 2025 годзе; у той час як беларускія прапагандысты рэгулярна распаўсюджваюць дэзінфармацыю пра краіны ЕС і яе афіцыйных асобаў і закрываюць доступ да інфармацыі", — цытуе Радыё "Свабода" адзін з пунктаў рэзалюцыі.

Таксама ў дакуменце гаворыцца, што ў выніку рэпрэсій рэжыму Лукашэнкі радзіму вымушына пакінулі больш за 500 тысяч беларусаў. Сам рэжым у рэзалюцыі называецца "нелегітымным, незаконным і злачынным". Еўрапарламент дэкларуе "непахісную падтрымку" беларускай дэмакратычнай супольнасці на чале са Святланай Ціханоўскай.

Еўрадэпутаты заклікаюць не прызнаваць "выбары прэзідэнта" ў Беларусі, а таксама не прызнаваць легітымнасць Лукашэнкі, які незаконна займае пасаду кіраўніка дзяржавы.

Яны нагадваюць пра пераслед палітвязняў, сярод якіх згадваюць лаўрэата Нобелеўскай прэміі міру Алеся Бяляцкага ды іншых. Акрамя таго еўрадэпутаты заклікаюць адказаць на арышт і прысуд прадстаўніку дэлегацыі ЕС Мікалаю Хіло.

Еўрапарламент заклікае разглядаць справы супраць рэжыму Лукашэнкі паводле ўніверсальнай юрысдыкцыі, звяртацца з пазовамі ў Міжнародны крымінальны суд, падтрымліваць працу праваабаронцаў, якія фіксуюць парушэнні правоў чалавека ў Беларусі.

У дакуменце нагадваюць, што рэжым Лукашэнкі падтрымлівае расійскую ваенную агрэсію супраць Украіны, і заклікаюць выяўляць і ліквідоўваць прагалы ў санкцыях.

Рэзалюцыя падкрэслівае неабходнасць спрыяць умацаванню беларускай нацыянальнай ідэнтычнасці і беларускай мовы, а таксама барацьбе са скажэннем і маніпуляцыяй беларускай гісторыяй, якія рэжым Лукашэнкі робіць ва ўгоду Расіі.

Таксама ў дакуменце асуджаецца вываз тысяч украінскіх дзяцей з акупаваных тэрыторый (у тым ліку з удзелам Беларускага Чырвонага Крыжа), сярод якіх прапагандуюць расійскую ідэалогію.