Дзяўчынка ледзь не трапіла пад аўтамабіль ДАІ падчас пагоні за п'яным кіроўцам

Дзяўчынка ледзь не трапіла пад аўтамабіль ДАІ падчас пагоні за п'яным кіроўцам. Здарэнне адбылося 17 лютага ў Маладзечне. Школьніца пераходзіла вуліцу па пешаходным пераходзе. Яна не рэагавала на гукавыя сігналы, не звяртала ўвагі на патрульны аўтамабіль, які імкліва набліжаўся. Як адзначае прэс-служба міліцыі Мінскай вобласці, толькі дзякуючы вадзіцельскаму майстэрству супрацоўніка дарожнай міліцыі, дзяўчынка не апынулася пад коламі легкавіка. Аўтамабіль абмінуў яе, а школьніца спакойна працягнула шлях і перайшла вуліцу.

Што да нецвярозага 32-гадовага мужчыны, які ехаў па горадзе на "Вольва", то яго супрацоўнікі ДАІ затрымалі. У яго не было пасведчання кіроўцы. За кіраванне ў стане алкагольнага п'янення ў снежні 2012-га мужчыну прыцягвалі да крымінальнай адказнасці і пазбавілі правоў кіроўцы на 5 гадоў. Цяпер жа на яго склалі адразу некалькі пратаколаў аб адміністрацыйным правапарушэнні.