Беларус Аляксей Шпілеўскі можа ўзначаліць варшаўскую "Легію"

"Мой наступны клуб дакладна будзе па-за межамі Кіпра. Я павінен улічваць усё. Для мяне вельмі важнае і асяроддзе, у якім будзе жыць уся мая сям’я", — сказаў Шпілеўскі, адказваючы на пытанне пра будучыню.

СМІ таксама паведамляюць, што да яго цікавасць праяўляе і маскоўскае "Дынама".

Пакуль жа каманда Шпілеўскага працягвае барацьбу за чэмпіёнства Кіпра — "Арыс" займае другое месца ў табліцы, саступаючы чатыры ачкі лідару — "Пафасу".

Вялікую частку жыцця Аляксей Шпілеўскі правёў у Германіі. Спачатку ён быў гульцом акадэміі "Штутгарта", але хутка завяршыў ігравую кар’еру. Трэнерскую дзейнасць пачаў у SG Sonnenhof, затым ізноў працаваў у сістэме "Штутгарта", а пасля пяць гадоў трэніраваў моладзевыя каманды "РБ Лейпцыг".

Яго першай дарослай камандай стала "Дынама-Брэст", дзе ён сутыкнуўся з супрацьдзеяннем з боку вопытных гульцоў, у тым ліку зоркі Арцёма Мілеўскага. Уладальнік клуба, бізнесмен Аляксандр Зайцаў, хутка зняў Шпілеўскага з пасады галоўнага трэнера.

Пазней ён узначаліў "Кайрат" з Алматы, з якім выйграў чэмпіянат Казахстана.

З лютага 2022 года Аляксей Шпілеўскі ўзначальвае "Арыс". За 134 матчы яго сярэдні паказчык — 1,84 бала за гульню. У яго дасягненнях на Кіпры — чэмпіёнскі тытул, Суперкубак і выступленні ў еўракубках.