Баскетбольны клуб "Мінск" згубіў 1,5 мільёна рублёў праз Дзяржкантроль

Праз рашэнні Камітэта дзяржкантроля баскетбольны клуб "Мінск" пазбавіўся 1,5 мільёна рублёў. Такую суму назваў яго старшыня Пётр Івашкоў.

Пад канец лістапада стала вядома, што баскетбольным клубам зацікавілася падатковая інспекцыя. Івашкоў казаў, што гаворка ідзе пра даўнія парушэнні, некаторыя з іх аспрэчваюцца.

Дзяржкантроль вынес свае рашэнні наконт клуба. "Кампетэнтныя органы, якія грунтаваліся на гэтых высновах, пазбавілі нас магчымасці атрымліваць спонсарскія грошы. І другое: нам нельга расходаваць пазабюджэт. Калі няма спонсарскіх грошай і пазабюджэту, можаце ўявіць, як мы жывем", — паскардзіўся Івашкоў ў праграме "Арэна" на тэлеканале "Беларусь 1".

Самай галоўнай непрыемнасцю для клуба стала забарона на атрыманне спонсарскай дапамогі паводле падпісаных ужо дамоваў. "На гэтым мы страцілі каля 1,5 мільёна беларускіх рублёў. Гэта тое, што павінна было паступіць ужо па выніках зробленай працы. Ад арганізацый, прадпрыемстваў, якія абавязаныя былі пералічыць грошы, але не змаглі гэтага зрабіць праз пастановы. Фактычна ў нас забралі гэтыя 1,5 мільёна. Прычым за парушэнні папярэдніх гадоў", — заявіў кіраўнік клуба.

У мінулым сезонк БК "Мінск" праваліў выступ у Лізе ВТБ: з 40 матчаў беларускія баскетбалісты прайгралі 39. Пасля гэтага "Мінск" заявіў, што пакідае лігу. Таксама сёлета клуб другі год застаўся без Кубка Беларусі.