За перавышэнне хуткасці ДАІ аштрафавала беларуса, які сядзіць у калоніі
Кіроўца, ілюстрацыйнае фота / delfi.lt
Пра цікавы выпадак паведамляе прэс-служба пракуратуры.
Дзяржаўтаінспекцыя выпісала штраф беларусу за перавышэнне хуткасці. Здарэнне адбылося ў снежні 2021 года.
Мужчыну аштрафавалі на 256 рублёў (8 базавых велічыняў на той час). Але выявілася, што ён у той момант адбываў пакаранне ў выглядзе пазбаўлення волі.
Пракуратура вынесла пратэст з улікам таго, што вінаватасць мужчыны не была дакладна пацверджаная доказамі.
"Тэрытарыяльным аддзелам ДАІ пратэст намесніка пракурора раёна задаволены — пастанова ў справе аб адміністрацыйным правапарушэнні скасаваная, а справа — спыненая", — канстатавалі ў пракуратуры.
