Чарга на беларуска-польскай мяжы вырасла ў шэсць разоў
Мытны пункт / Мытны камітэт
Чарга на выезд з Беларусі праз Польшчу за тыдзень вырасла ў шэсць разоў. Мытны камітэт Беларусі звязвае гэта з закрыццём беларуска-літоўскай мяжы.
Тыдзень таму выезду праз памежны пункт "Брэст" чакалі 300-400 аўтамабіляў. Сёння ў чарзе больш за 2,5 тысячы легкавікоў.
А вось чарга з грузавікоў і на беларуска-польскай, і на беларуска-латвійскай спярша павялічылася, а потым "вярнулася да стабільных для цяперашняга часу паказчыкаў". Гэта звязана з тым, што беларускія ўлады вырашылі адпомсціць літоўцам і дазволілі літоўскім фурам выязджаць толькі праз беларуска-літоўскі ўчастак мяжы.
29 кастрычніка літоўскі ўрад вырашыў зачыніць мяжу з Беларуссю на месяц — да 30 лістапада. Гэта адбылося пасля неаднаразовага масавага запуску кантрабандных метэазондаў з тэрыторыі Беларусі.
