Венгрыя выходзіць з юрысдыкцыі Міжнароднага крымінальнага суда
Біньямін Нетаньяху ў Венгрыі / Reuters
Венгрыя выходзіць з юрысдыкцыі Міжнароднага крымінальнага суда. У чацвер урад "пачне працэс выхаду ў адпаведнасці з канстытуцыйнымі нормамі і палажэннямі міжнароднага права", паведаміў кіраўнік адміністрацыі прэм’ер-міністра Венгрыі Гергель Гуяш. МЗС Ізраіля вітае рашэнне Венгрыі.
Адбываецца гэта на фоне візіту ў Венгрыю прэм’ер-міністра Ізраіля Біньяміна Нетаньяху, у дачыненні да якога дзейнічае ордар на арышт, выдадзены МКС у 2024 годзе "за дзеянні ізраільскіх вайскоўцаў у сектары Газа". Прэзідэнт ЗША Дональд Трамп у лютым падпісаў указ аб санкцыях у дачыненні Міжнароднага крымінальнага суду за "незаконныя і беспадстаўныя дзеянні" ў дачыненні ЗША і Ізраіля.
Венгрыя падпісала Рымскі статут аб Міжнародным крымінальным судзе ў 2001 годзе. Працэс выхаду можа заняць да года.
