Уладальніка Maserati падазраюць у махлярстве — яго аўтамабіль таямніча згарэў

Уладальніка Maserati Quattroporte падазраюць у махлярстве. Аўтамабіль быў застрахаваны на 65 тысяч долараў і згарэў у апошні дзень страхоўкі.

Як паведамляе прэс-служба Следчага камітэта, 31 студзеня апоўначы ён паведаміў у ДАІ, што ў Мінскім раёне на аўтадарозе М-1 Брэст — Мінск — мяжа Расійскай Федэрацыі ён трапіў у ДТЗ, у выніку чаго яго легкавік цалкам згарэў. Па словах мужчыны, перад яго аўтамабілем раптоўна з'явіўся невядомы мужчына з роварам у руках. Кіроўца паспрабаваў аб'ехаць невядомага, але закрануў верагодна ровар і апынуўся ў кювеце. Ён пайшоў шукаць пешахода, але яго на месцы не аказалася. У гэты момант і загарэлася машына, якую патушыць не ўдалося.

У пачатку лютага мінчук звярнуўся ў страхавую кампанію з заявай аб выплаце яму страхавой кампенсацыі. Аднак у выніку праверкі інфармацыя мужчыны пра абставіны дарожна-транспартнага здарэння не пацвердзілася (праводзіліся экспертызы). Напрыклад, на ровары не знайшлі слядоў сутыкнення з легкавіком. На месцы здарэння не было слядоў пешахода.

У выніку, у адносінах 48-гадовага мінчука распачатая крымінальная справа. Артыкул — "Замах на махлярства, здзейсненае ў асабліва буйным памеры".