У Рагачове правялі "затор памяці"
Так выглядала "хвіліна маўчання" ў Рагачове / slova.by
22 чэрвеня па ўсёй Беларусі праводзіліся "хвіліны маўчання" — у памяць пра дату нападу нацысцкай Германіі на СССР у 1941 годзе. Асабліва арыгінальна адзначылі гэтую дату ў Рагачове, заўважыла выданне "Флагшток".
Відэа акцыі з'явілася ў TikTok-акаўнце раённай дзяржаўнай газеты "Свабоднае слова". Мерапрыемства адбывалася ў цэнтры горада, дзе вуліца Леніна (асноўная гарадская магістраль) перасякае цэнтральную плошчу, насупраць мясцовага выканкама.
Для "хвіліны маўчання" супрацоўнікі ДАІ папросту спынілі рух з усіх бакоў. На скрыжаванні паставілі рэгуліроўшчыка не толькі з жазлом, але і з пісталетам. Непадалёк стаялі і машыны міліцыі з мігалкамі.
Аўтамабілістам давялося стаяць у заторы і слухаць гучную прамову з рэпрадуктара пра гадавіну нападу нацысцкай Германіі на СССР. У "заторы памяці" не па сваёй волі сабраліся дзясяткі машын.
На відэа можна заўважыць таксама, што цэнтр горада амаль пусты. Нешматлікія мінакі спыніліся на месцы і напружана стаялі ўвесь час акцыі пад метраном і пафасны тэкст дыктара.
