У Мінску сёння чакаюць расійскага прэм'ера Міхаіла Мішусціна
Апошні раз Міхаіл Мішусцін прылятаў у Мінск у красавіку / БЕЛТА
Заўтра, 28 траўня, у Мінску пройдзе пасяджэнне Савета кіраўнікоў урадаў СНД, але расійскага прэм'ера Міхаіла Мішусціна ў Мінску чакаюць ужо сёння.
Аб працоўным візіце Мішусціна 27-28 траўня ў Беларусь паведамляе ТАСС. Мяркуецца, што акрамя працы ў рамках саміту СНД, адбудзецца сустрэча расійскага прэм'ера з беларускім калегам Раманам Галоўчанкам.
Аб гэтай сустрэчы кіраўнікі ўрадаў дамовіліся 24 траўня падчас тэлефоннай размовы. Адной з тэм гэтай размовы быў інцыдэнт з самалётам Ryanair. Беларускі бок тады паведамляў, што Галоўчанка інфармаваў расійскага калегу аб тым, што адбылося, і пра "тыя недружалюбныя і правакацыйныя дзеянні еўрапейскіх дзяржаў, якія прымаюцца ў дачыненні да Беларусі".
На заўтра запланавана таксама сустрэча Аляксандра Лукашэнкі з расійскім прэзідэнтам Уладзімірам Пуціным.
