У мінскім тэатры за гадзіну раскупілі квіткі на прэм'еру паводле Быкава
Тэатр лялек у Мінску / sb.by
У мінскім Тэатры лялек за гадзіну раскупілі квіткі на два месяцы.
Днямі тэатр анансаваў прэм’еру — спектакль "Хутар" паводле аповесці Васіля Быкава "Знак бяды". Рэжысёрам выступае вядомы Яўген Карняг.
7 траўня тэатр апублікаваў афішу з гэтым ды іншымі спектаклямі на чэрвень-ліпень. І менш чым за гадзіну ўсе квіткі былі раскупленыя, заўважыла "Наша Ніва". Тыя, каму не пашанцавала купіць квіток, могуць набыць тое, што застаецца ў касе — у тым ліку месца на прыстаўных крэслах, квіткі на якія прадаюцца ў дзень паказаў.
Ажыятаж на спектаклі мінскага Тэатра лялек фіксуецца даўно. Дырэктарка тэатра кажа, што праблему спрабавалі развязаць праз большую колькасць паўтораў у афішы. Таксама тэатр перастаў загадзя паведамляць пра пачатак продажаў — каб пазбегнуць напружання. Аднак гэтыя меры не дапамаглі.
Акрамя фанатаў тэатра сайт атакуюць і боты, перакупы, якія пазней перапрадаюць квіткі па завышаных коштах.
